АҚШ Украинадаги низо музокаралар йўли билан ҳал қилинишига эришмоқчи, дея маълум қилди мамлакат Миллий хавфсизлик кенгаши стратегик коммуникациялар бўйича координатори Жон Кирби.
«Президент (Жо Байден)нинг мақсадлари бошиданоқ яққол эди… Биз Россия билан зиддиятга боришни хоҳламаймиз. Бу биринчи ўринда», — деди у. Шунингдек, Кирби АҚШ Россияда ҳокимиятни алмаштиришга интилмаётганини яна бир марта маълум қилди.
Вашингтон бу ҳақда аввал ҳам бир неча марта гапирган, унинг сиёсати Россияга, «шафқатсиз санкциялар ёрдамида» ўз ҳарбий операция ҳақидаги қарори оқибатларини ҳис қилдиришга ҳамда Украинага гуманитар ёрдам беришга қаратилганини таъкидлаган эди.
Бошқа вазифалар қаторида Кирби НАТОнинг шарқий қанотини мустаҳкамлаш ва Украинага ёрдам кўрсатиб, президент Владимир Зеленский Россия билан «музокаралар столида муваффақиятга эришиш учун зарур бўлган барча кўмак ва воситалар»га эга бўлишини таъминлашни айтиб ўтди. АҚШ Украина жанг майдонида муваффақият қозониши учун унинг ўзини ҳимоя қилиш қобилиятини қўллаб-қувватлашда давом этади, деб ваъда берди Оқ уй вакили.
Байден маъмурияти Россия билан қарама-қаршиликка интилмаётгани ва Украинадаги жанговар ҳаракатларда қатнашмаслиги ҳақида аввал ҳам кўп бора баёнот берган. Шунга қарамай, Вашингтон, Москва ядро қуролидан фойдаланишга қарор қилган тақдирда, уни «ҳалокатли оқибатлар» кутиши ҳақида огоҳлантирган.
Изоҳ (0)