Дон битими доирасида келишиб олинган хавфсиз йўлак орқали кемалар ҳаракати тўхтатилди. Бу ҳақда Россия Мудофаа вазирлиги хабар берди.
Муассаса кемалар ҳаракатини «номақбул» деб атади, чунки, Москва талқинига кўра, «Украина раҳбарияти ва Украина қуролли кучлари қўмондонлиги ундан Россия Федерациясига қарши жанговар ҳаракатлар олиб бориш учун фойдаланмоқда».
Мудофаа вазирлиги баёнотида таъкидланишича, Россия битимдан узил-кесил чиқмайди, шунчаки унинг амал қилишини тўхтатади — йўлак Украина томонидан жанговар ҳаракатлар учун фойдаланмаслиги бўйича кафолатлар берилгунига қадар.
Россия дон битимини чиқишини 29 октябрь куни, Севастопол портидаги кемалар дронлар ҳужумига учраганидан кейин эълон қилган эди. Россия Мудофаа вазирлиги даъво қилишича, дронлардан бири Украина дони ортилган кемадан учирилган.
БМТ эса 31 октябрь куни Севастополга ҳужум дон битими шартларини бузган деб ҳисобламаслигини маълум қилди. Ташкилот битим амал қилишда давом этяпти, деб ҳисоблашини таъкидлади.
Дон битими
«Дон битими» Россия ва Украина томонидан алоҳида-алоҳида Туркия ва БМТ билан 22 июлда имзоланган эди. Томонлар дон ортилган кемалар Қора денгиз орқали ўтиши учун хавфсиз йўлак яратиш мажбуриятини олди, БМТ, Туркия ва Украина вакиллари ҳарбий юклар ортилишини истисно қилиш учун назорат олиб боришга келишиб олди. Битим узайтириш имконияти билан уч ойга тузилди. Биринчи юк кемаси Одесса портидан 1 август куни чиқиб кетди.24 февраль куни Россия операцияси бошланганидан кейин Украина портларидан дон ортилган кемалар чиқолмай қолган эди. Киев ва Ғарб мамлакатлари бунда Москвани айблади ва озиқ-овқат инқирози ҳақида огоҳлантирди. Россия, ўз навбатида, портлар украиналик ҳарбийлар томонидан миналаштирилгани туфайли озиқ-овқат чиқиб кетолмаётганини даъво қилди. Охир-оқибат, у ерда, турли ҳисоб-китобларга кўра, 4,5 миллиондан 20 миллион тоннагача буғдой ва маккажўхори тўпланиб қолди.
Дон битими муддати ноябрь охирида тугаши, барча томонлар рози бўлган тақдирда, шартнома узайтирилиши мумкин эди.
Россия ўз иштирокини тўхтатди
29 октябрь куни Украина дронлари дон йўлаги хавфсизлигини таъминлашга жалб қилинган Қора денгиз флоти кемаларига ҳужум қилгач, Россия дон битимидаги иштирокини «номаълум муддатга» тўхтатиб қўйди. АҚШ ва Евроиттифоқ Москвани бу қарорни бекор қилишга чақирди. БМТ ва Туркия дон битимини хавф остига қўювчи қадамларга қарши чиқди.Россия Мудофаа вазирлиги Украина қуролли кучлари ҳужумни Британия Ҳарбий-денгиз кучлари мутахассислари раҳбарлиги остида амалга оширганини айтмоқда. Россиянинг дон битимига қайтиши ҳақида кемага уюштирилган ҳужум юзасидан суриштирув олиб борилганидан кейин гапириш мумкин бўлади, деди Россия ташқи ишлар вазири ўринбосари Андрей Руденко.
Изоҳ (0)