Россия президенти Владимир Путин Россияда сафарбарлик якунланганини маълум қилди. Бундай баёнотни у Сочида, Арманистон ва Озарбайжон раҳбарлари билан музокаралардан кейин ташкил қилинган матбуот анжуманида берди, деб ёзади Meduza.
Шу билан бирга, Путин тегишли фармонни ҳали имзоламаганини таъкидлади ва ўзи бундай фармон керакми, йўқми — шуни билмаслигини айтди.
«Ҳа, бу (сафарбарликнинг эълон қилиниши) менинг фармоним билан амалга оширилганди… лекин Мудофаа вазирлиги таклифи билан қилинган, энди эса Мудофаа вазирлиги сафарбарлик тадбирларини якунлашни таклиф этди. Мен ҳатто, очиғини айтганда, бу ҳақда ўйламаган эдим. Ҳуқуқшунослар билан гаплашиб кўрай, сафарбарлик якунлангани ҳақида фармон чиқариб, кейин эълон қилиш керакмикан. Лекин у якунланган, нуқта қўйилган», — деди Россия президенти.
Шунингдек, Путин маълум қилишича, ҳозирда қуролли кучларнинг жанговар сафларида бор-йўғи 41 минг нафар сафарбар этилганлар бор, 259 минг киши эса «жанговар ҳаракатларда умуман қатнашгани йўқ, улар тайёргарликдан ўтмоқда». Айни пайтда у мудофаа вазири Сергей Шойгунинг маърузасига таянди. Шойгунинг ўзи қўшинларга 82 минг киши юборилганини айтганди.
31 октябрь куни Россия Мудофаа вазирлиги чақирув қоғозлари юборишни тўхтатишини эълон қилганди. Шойгу Путинга сафарбарлик тадбирлари тугагани ҳақида 28 октябрь куни ҳисобот берган.
Шойгунинг баёнотларига қарамай, Россиянинг турли ҳудудларидан одамларга чақирув қоғозлари келишда давом этаётгани ҳақида хабарлар келиб тушган. Путиннинг матбуот котиби Дмитрий Песков буни ҳарбий комиссариатларнинг «муайян инерсияси» билан изоҳлаган эди.
Эслатиб ўтамиз, Россияда қисман сафарбарлик 21 сентябрь куни эълон қилинди ва 300 минг киши армияга чақилиши маълум қилинди. 14 октябрь куни аллақачон 222 минг киши сафарбар этилгани ҳақида хабар берилди.
Изоҳ (0)