Британия Мудофаа вазирлиги Украинадаги урушнинг боришига оид кунлик таҳлилида Россиядаги сафарбарлик доирасида хизматга чақирилганлар эски қуроллар билан фронтга жўнатилаётганини хабар қилди.
Очиқ манбалардан олинган тасвирларга кўра, сафарбар қилинганларга АКМС автоматлари тарқатилган. Бу 1960 йилларнинг бошларида СССР томонидан ишлатилган АКМ (модернизацияланган Калашников автомати) версияси. Буюк Британия Мудофаа вазирлиги маълумотларига кўра, бундай автоматларнинг захиралари омборларда сақланиб турган ва уларнинг аксарияти ёмон шароит туфайли яроқсиз ҳолга келган бўлиши мумкин.
АКМС 1943 йил намунасидаги 7,62х39 миллиметрли патронларни отади, Британия ҳарбийларининг қайд этишича, Россия армиясининг оддий қисмлари асосан 5,45х39 мм патронлардан фойдаланган ҳолда АК-74М ёки АК-12 автоматлари билан қуролланган. Буюк Британия Мудофаа вазирлигининг фикрига кўра, фронт чизиғини турли хил ўқ-дорилар билан таъминлаш зарурати Россия армиясининг логистика занжирларига янада катта юк бўлади, улар ҳозирги босимга зўрға бардош бермоқда.
Изоҳ (0)