АҚШ Украинага 275 миллион долларлик янги ҳарбий ёрдам пакетини тақдим этади, деб хабар бермоқда Associated Press манбаларга таяниб.
Агентлик ёзишича, янги пакетда янги қуроллар йўқ, ёрдам асосан аввал берилган қурол тизимларини ўқ-дорилар билан таъминлашга қаратилган бўлади. Хусусан, гап Украина қарши ҳужумда фойдаланаётган HIMARS ёппасига ўт очувчи реактив тизимлари ҳақида бормоқда.
Қуроллар Пентагоннинг захиралардаги қуролларни камайтириш дастурига мувофиқ юборилаётган бўлиши мумкин.
Янги ёрдам пакети ҳақида расман 28 октябрда эълон қилиниши кутилмоқда. Ушбу ёрдамни ҳам қўшиб ҳисоблаганда, 24 февралдан бери АҚШнинг Украинага ҳарбий ёрдами ҳажми қарийб 18 миллиард долларга етади.
26 октябрь куни АҚШ Украинага биринчи NASAMS зенит-ракета комплексларини топширгани маълум бўлган эди.
NASAMS — ўрта масофага мўлжалланган ҳаво мудофаа тизими. У «ҳаво-ҳаво» ракетасини олиб юради. Комплекс мавжуд ва яқинлашаётган душман самолётлари, дронлари ва қанотли ракета таҳдидларини аниқлаш, уриш ва йўқ қилиш қобилиятини максимал даражада оширади.
NASAMS’дан 12 та давлат, жумладан АҚШ, Норвегия, Финляндия, Испания, Нидерландия, Уммон, Литва, Индонезия, Австралия, Қатар, Венгрия ва номи ошкор этилмаган яна бир давлат фойдаланади.
Изоҳ (0)