Россия президенти Владимир Путин февраль ойида Пекинга ташрифи чоғида Хитой раиси Си Цзиньпинни Украинада ҳарбий операция бошлаши ҳақида огоҳлантирмаган. Бу ҳақда у «Валдай» халқаро мунозаралар клуби йиғилишида айтиб ўтди, деб ёзади «РБК».
У Си Цзиньпинни махсус операция бошлаш режалари ҳақида хабардор қилган-қилмагани ҳақидаги саволга «Йўқ», — деб жавоб берди.
Шундан кейин Россия президентига «Хитой етакчиси уни бу режалардан хабардор қилмагани учун хафа бўлганини билдирмадими?» — қабилида савол беришди. «Биласиз, Хитой етакчиси нимадандир хафа бўлганини айтадиган одам эмас. У жаҳон миқёсидаги мустақил етакчи. Ундан кейин, бизда бундай зарурият йўқ, биз суверен қарорлар қабул қиламиз, Россия ҳам, Хитой Халқ Республикаси ҳам», — деди Путин.
Унинг сўзларига кўра, НАТОнинг ўз инфратузилмасини Россия чегараларига суриб келишга интилиши Россия учун нимани билдиришини, Донбассда сўнгги саккиз йилда нималар содир бўлганини ва 2014 йилда Украинадаги давлат тўнтариши сабабларини Пекин кўриб турибди.
«Хитой раҳбарияти Украинадаги инқирозга тинч йўл билан мантиқий, мувозанатлашган ечим топиш тарафдори ва биз бу позицияга ҳурмат билан ёндашамиз», — дея қўшиб қўйди Путин.
Путин ва Цзиньпиннинг назарда тутилаётган учрашуви 4 февраль куни Пекинда бўлиб ўтган. Ўшанда эълон қилинган қўшма баёнотда Хитой Россиянинг НАТО шарққа кенгаймаслиги ҳақидаги талабини ва Европада хавфсизлик кафолатлари бўйича бошқа таклифларни қўллаб-қувватлаганди.
Россия Украинада ҳарбий операция бошлаганидан буён Хитой бетараф позицияни эгаллаб, Украина ҳудудий яхлитлигини ёқлаб келаётганди, аммо санкциялар киритмаган. Россияда қисман сафарбарлик эълон қилингач, Пекин ҳарбий ҳаракатларга нуқта қўйиш ва томонларнинг хавфсизлик соҳасидаги хавотирларини бартараф қилиш учун уларни музокараларга чақирди.
Кейинроқ Хитой Ташқи ишлар вазирлиги томонлар дастлабки шартларсиз музокараларни қайта бошлаши кераклигини айтди.
Изоҳ (0)