Ижтимоий тармоқларда Қозоғистоннинг Улитау вилояти Жанаарка туманига ракета келиб тушгани ҳақида хабарлар тарқалмоқда, деб ёзади Tengrinews. Вазият юзасидан маҳаллий ҳокимият изоҳ берди.
Жанаарка тумани аҳолиси Оринбай қишлоғи яқинидаги даштга қулаган космик кема бўлакларини видеога олган. Фуқаролар кема бўлаклари одамлар соғлиғи ва экология учун зарарли бўлиши мумкинлигидан хавфсирамоқда.
Жанаарка тумани ҳокимлиги маълум қилишича, бу ерга келиб тушган бўлаклар «Прогресс МС-21» юк кемасига тегишлидир.
«Бу ‘Прогресс МС-21’ юк кемасининг бир бўлагидир. У Оринбай аҳоли пунктидан 25 км узоқликка қулаб тушган. Бу ерга яқин жойлашган қишловхона аҳолиси эвакуация қилинди. Оринбай қишлоғи аҳолисини эвакуация қилмадик», — дейилади хабарда.
Таъкидланишича, «Роскосмос» мутахассислари космик кема ерга қулаётгани ҳақида олдиндан билган ва унинг бўлаги қаерга келиб тушишини аниқлаган. «Улар томонидан тезкор чора кўрувчи махсус гуруҳ тузилиб, бу жойни назорат қилиб турган. Космик кема биринчи поғонаси бўлаклари аллақачон олиб кетилган, улар хавф туғдирмайди», — дея маълум қилди ҳокимлик матбуот хизмати.
Россиянинг «Прогресс МС-21» кемаси ортилган «Союз-2.1а» элтувчи ракетаси 26 октябрь куни Қозоғистондаги Бойқўнғир космодромидан учирилганди. 28 октябрь куни кема Халқаро коинот станциясининг Россия сегментига бориб туташгани хабар берилди.
«Прогресс МС-21» орбитал станцияга 2520 кг юк, шу жумладан, 702 кг ёнилғи, 420 кг ичимлик суви, 41 кг азот ва 1357 кг турли ускуна ва материаллар, кийим-кечак, озиқ-овқат олиб чиққан.
Маълумот учун: Ракета поғонаси — механик тарзда бирлаштирилган бир нечта ракетадан иборат кўп поғонали ракетанинг бир қисми. Поғоналар парвоз чоғида ажралиб чиқади.
Изоҳ (0)