Туркманистонда юзлаб маҳбуслар Украинадаги урушга юборилгани маълум қилинди

Туркманистонда камида 500 нафар рус тилида сўзлашувчи маҳбусларни йиғиб, Москвага юборишган, сўнг улар Вагнер гуруҳи таркибида Украинадаги урушга жўнатилган. Бу ҳақда туркманистонлик мухолифатчи сиёсатчи Мурод Қурбонов маҳаллий фаолларга таяниб маълум қилди.

Маҳбусларга, гўёки, Россия паспортлари берилган, улар ўн кун давомида ҳарбий тайёргарликдан ўтказилган, шундан кейин уларнинг ҳаммаси фронтга жўнатилган. Шартнома бўйича жанг қилиш эвазига судланганликни олиб ташлашни ва 1000 доллар тўлашни ваъда қилишмоқда.

Туркманистон фуқароларининг ўлимини эса маҳаллий махсус хизматлар коронавирусга йўймоқда, уларнинг жасадлари қариндошларига берилмаслигини шу билан изоҳламоқда.

Аввалроқ «Вагнер» хусусий ҳарбий компанияси ва Россия Мудофаа вазирлиги «ёлловчилари» бутун мамлакат бўйлаб 15 130 нафар маҳбусни урушга олиб кетгани маълум қилинган эди.

ОАВларда июль бошида Вагнер хусусий ҳарбий компанияси Россия колонияларидаги маҳбусларни ёллаётгани ҳақида хабарлар пайдо бўла бошлади. Компания вакиллари мамлакатнинг 13 та минтақасидаги 21 та колонияда боргани хабар қилинган.

«Медиазаона» маълумотларига кўра, маҳбуслар орасида ташвиқот олиб бориш учун бизнесмен Евгений Пригожиннинг шахсан ўзи ҳам борган, у Вагнер хусусий ҳарбий компанияси эгаси ҳисобланади. Жанговар ҳаракатларда қатнашиш эвазига маҳбусларга 100 минг рубль маош, мукофот пуллари, улар ҳалок бўлган тақдирда, оилаларига тўловлар, шунингдек, якунда аминистия ваъда қилинган.

Кейинроқ Россия Мудофаа вазирлиги Украина билан урушга маҳбусларни ҳам жалб қилишни бошлагани, улардан «Шторм» махсус отряди тузилаётгани, унинг таркибига ҳуқуқни муҳофаза қилиш органларининг маҳкум ходимлари кираётгани хабар берилди.

Россияда меҳнат муҳожирлари урушга юборилмоқдами?

Шунингдек, Марказий Осиё мамлакатларидан келган муҳожирлар ихтиёрий ҳарбий хизмат ҳақида шартномалар тузишга мажбурланаётгани ҳақида ҳуқуқ ҳимоячиси Валентина Чупик ҳам айтиб ўтди.

Эслатиб ўтамиз, 20 сентябрь куни Россия Давлат думаси янги қонун қабул қилди, унга мувофиқ, армияда бор-йўғи бир йил хизмат қилганлар ушбу мамлакат фуқаролигини қўлга киритиши мумкин бўлади.

Шундан кейин Ўзбекистон Бош прокуратураси хориждаги ўзбекистонликларга мурожаат қилиб, уларни чет давлатлар ҳарбийлашган тузилмаларига ёлланиш жавобгарликка сабаб бўлишидан огоҳлантирганди. Шунингдек, Ўзбекистоннинг Россиядаги элчихонаси фуқароларни ҳарбий ҳаракатларда иштирок этмасликка чақирди.

Шунингдек, Россиядаги ҳарбий хизматга чет эл фуқаролари, шу жумладан, Марказий Осиё давлатларидан келган меҳнат муҳожирлари мажбурий чақирилиши ҳақидаги миш-мишлар рад этилди. Россиянинг Ўзбекистондаги элчихонаси маълум қилишича, интернетда тарқалган бундай хабарлар ҳақиқатга тўғри келмайди.

Вагнер гуруҳи ўзи қандай гуруҳ?

Унга махсус топшириқли бўлинма собиқ жангчиси Дмитрий Валеревич Уткин асос солган деб ҳисобланади, у гуруҳга Гитлернинг севимли композитори Ричард Вагнернинг номини берган.

Кўплаб Ғарб ОАВлари Вагнер гуруҳи тўғридан-тўғри Владимир Путинга бўйсунишини ёзади. Унинг ёлланма жангчилари болаларни ўлдириш, аёлларни зўрлаш ва қийноққа солиш, шунингдек, шафқатсиз қотилликларда айбланиб келади.