Германия президенти Франк-Валтер Штайнмаер бугун, 25 октябрь куни эрталаб эълон қилинмаган ташриф билан Киевга келди, деб хабар бермоқда НТВ телеканали. Бу унинг Россия босқини бошланганидан бери Украинага биринчи сафари. Штайнмаер Украина президенти Владимир Зеленский билан учрашиши кутилмоқда.
Focus журналининг қайд этишича, Германия президенти Украинага учинчи уринишда келган. Дастлаб унинг ташрифи 12 апрелга белгиланган эди, бироқ ўша куни Украина ташаббуси билан бу бекор қилинди. Франк-Валтер Штайнмаернинг сўзларига кўра, Киевда бу ташриф номақбул деб топилган. У Зеленскийдан тушунтириш талаб қилди. Иккинчи ташриф 20 октябрга белгиланган эди, бироқ Россиянинг Украина шаҳарларига ҳужумлари кучайгани сабабли хавфсизлик нуқтаи назаридан сафар бекор қилинди.
Ўша куни Германия ва Украина президентлари телефон орқали гаплашган. Штайнмаер Украинага инфратузилмани тиклашда кўмак ваъда қилган. Октябрь ойида Германия Киевга ҳарбий ёрдамнинг навбатдаги партиясини хусусан, патронлар ва қишки кийим-кечакларни топширди. Бундан ташқари, Германия канцлери тез орада Украинага яна учта ИРИС-Т зенит-ракета комплекси топширилишини маълум қилди.
Изоҳ (0)