Саудия валиаҳд шаҳзодаси Жо Байденнинг устидан кулади — WSJ

Саудия Арабистони валиаҳд шаҳзодаси Муҳаммад бин Салмон шахсий суҳбатлар чоғида Америка президенти Жо Байденни танқид қилади, унинг устидан кулади ва унинг ақлий қобилиятларини шубҳа остига қўяди. Бу ҳақда The Wall Street Journal қироллик ҳукуматидаги аноним манбаларига таяниб хабар берди.

Уларнинг сўзларига кўра, валиаҳд шаҳзода ўз маслаҳатчиларига АҚШнинг аввалги президенти Дональд Трамп билан ҳамкорлик қилиш у учун «анча афзалроқ бўлгани»ни, Байден эса Барак Обама даврида вице-президент бўлган пайтларидаёқ (2009—2017 йиллар) унга маъқул келмаганини айтган.

Бундан ташқари, Байден июль ойида бўлиб ўтган учрашувда суҳбат чоғида Саудия Арабистонида инсон ҳуқуқларининг бузилиши ва 2018 йилда журналист Жамол Қошиқчининг ўлимини тилга олиб, валиаҳд шаҳзодани ғазаблантирган. Нашрнинг саудиялик мансабдорлар орасидаги манбалари ғарб мамлакатлари билан муносабатларда бош масала нефть ва хавфсизликдан иборатлиги ҳафсалани пир қилишини айтган.

Ар-Риёд WSJ’нинг маълумотларини рад этди. «Аноним манбалар томонидан қилинган даъволар бутунлай ёлғон. Қироллик етакчилари ўзаро ҳурматга асосланган муносабатлар муҳимлигига ишонган ҳолда, АҚШ президентларига доим катта ҳурмат билан муносабатда бўлиб келган», — деди Саудия ташқи ишлар вазири Файсал бин Фархон.

Оқ уй матбуот котиби Карин Жан-Пьер WSJ’нинг маълумотларини «бемаъни баёнотлар» деб атади. «Лекин шуни аниқ қилиб айтишим мумкинки, президент бу администрацияда ишни бошлаганидан буён Саудия Арабистони билан алоқаларни қайта кўриб чиқиш кераклигини яққол билдирган, — дея қўшиб қўйди у. — Яқинда ОПЕК+ томонидан қабул қилинган қарорлар Россия билан келишилган, бу дунёнинг кўплаб иқтисодиётларига зарар етказади».

Аввалроқ АҚШ президенти Жо Байден ОПЕК+нинг 2022 йилнинг ноябрь ва декабрь ойларида нефть қазиб олиш квоталарини қисқартириш ҳақидаги қароридан сўнг Вашингтон ва Ар-Риёд ўртасидаги муносабатларни қайта кўриб чиқиш имкониятини маълум қилган эди.