Россиянинг Белгород вилоятида тўққиз ёшли бола «Украина қуролли кучлари томонидан фуқаролик инфратузилмаси объектларига зарбалар бериш учун фойдаланиладиган дронга ўхшаш қурилма» туфайли оғир яраланди. Бу ҳақда ҳудуд губернатори Вячеслав Гладков ўз Telegram-каналида маълум қилди.
Унинг сўзларига кўра, болакай қурилмани Белгород туманида кўчалардан бирида топиб олган, у унинг қўлида портлаб кетган.
Бола қўллардаги очиқ жароҳатлар билан касалхонага етказилган, унинг аҳволи оғир деб баҳоланмоқда.
Россиянинг Белгород вилояти уруш бошидан буён ўққа тутилиб келади, сўнгги вақтларда бу янада тез-тез содир бўлмоқда. Хусусан, 14 октябрь куни вилоятда ракеталар уриб туширилиши оқибатида поездлар ҳаракати тўхтатилганди. Ўша куни Белгород ўққа тутилиши сабабли подстанция ёниб кетган, эртаси куни эса нефть базасида ёнғин чиққанди. Мунтазам ўқ ёмғирлари туфайли, ҳудуд ҳукумати мактабларда муддатидан аввал таътил эълон қилди.
19 октябрь куни Россия президенти Владимир Путин Украинанинг босиб олинган ҳудудларида ҳарбий ҳолат эълон қилди, шунингдек, чегарага яқин вилоятларда, шу жумладан, Белгородда ҳам «жавоб кўрсатишнинг ўртача даражаси» махсус режими жорий этилди.
Мавзуга доир:
Изоҳ (0)