Жанубий Кореянинг маиший техника ишлаб чиқарувчи LG компанияси Подмосковьедаги заводини ёпиб, корхонани Россиядан кўчириб олиб кетмоқчи: компания Ўзбекистон ва Қозоғистондан бирини танламоқчи. Бу ҳақда «Коммерсантъ» хабар берди.
Ўзбекистонда музокаралар Artel компанияси билан олиб борилган, унинг заводларида, шу жумладан, Samsung техникаси ҳам ишлаб чиқарилади. Қозоғистонда LG заводи 1998 йилдан ишлашни бошлаган, аммо бир неча йил аввал у ёпилиб кетган. Ишлаб чиқаришни Ўзбекистонга кўчириб ўтказиш ишчи кучи арзон бўлгани сабабли манфаатлироқ, аммо Қозоғистонда сотиб олишга қурби етадиган истеъмолчилар кўпроқ, дейди экспертлар.
Нашрнинг маиший техника бозоридаги манбаси маълум қилишича, LG раҳбарияти Россияда совитгич, кир ювиш машинаси ва телевизор ишлаб чиқарувчи заводни ёпиш ҳамда корхонани Ўзбекистонга — Artel заводига кўчириш эҳтимолини муҳокама қилмоқда. Унинг сўзларига кўра, Россиядаги LG компанияси топ-менежментининг бир қисми аллақачон Тошкентга релокация қилган. Кўчиш режалари ҳақида ТеcomDaily бош директори Денис Кусков ҳам хабар топган. Artel Electronics нашрга маълум қилиҳсича, айни пайтда LG билан шериклик олиб борилмаяпти, музокаралар ҳақидаги ахборот эса фош этилмаяпти.
Шу билан бирга, «Коммерсантъ»нинг Қозоғистондаги манбаси айтишича, LG ушбу мамлакат ҳукумати билан келишув олиб бормоқда. LG заводи 1998 йилдан бошлаб Алматида ишлаган. Қозоғистон ҳукуматига яқин манбага кўра, завод бир неча йил аввал ёпилган, ҳозир эса Рақамли ривожланиш, инновациялар ва аэрокосмик саноат вазирлиги LG билан янги заводни очишни муҳокама қилмоқда.
«Holodilnik.ru» маълумотларига кўра, 2022 йилнинг январь—августида Россияда LG’нинг кир ювиш машиналари сегментидаги улуши 17 фоизни (2021 йилнинг шу даврида — 22%), совитгичлар сегментида 10% (12%), телевизорлар сегментида эса 7,8 фоизни (15,2%) ташкил этган. Ритейлернинг маълумотларига кўра, ушбу улушлар тезкорлик билан пасайишда давом этмоқда. LG менежменти Россиядаги завод тақдири ҳақида қандайдир қарор қабул қилиши керак, деб ҳисоблайди таҳлилчи Леонид Делицин.
«Ўзбекистонда корейс компаниялари билан ҳамкорликда фаолият олиб борувчи корхоналар сони 80 тадан ортиқ. Инқилобдан аввалги ва совет тарихи якунлари бўйича мамлакатда 200 минг нафар корейс миллати вакиллари яшайди, шу сабабли икки мамлакатнинг турли ишбилармонлик алоқалари ҳайрон қолдириши керак эмас», — дея қайд этди таҳлилчи.
Унинг фикрича, ишлаб чиқаришни Ўзбекистонга кўчириш арзон ишчи кучи нуқтаи назаридан Қозоғистонга кўчиришдан кўра манфаатлироқ бўлади. Бироқ, Делицин аниқлик киритишича, Қозоғистон бозори аҳоли жон бошига даромадлар даражаси юқорироқ бўлгани сабабли жозибадорроқдир.
«Holodilnik.ru» тижорат директори Алексей Погудалов LG Ўзбекистонга кўчиб ўтишига шубҳа билдирмоқда.
«Artel’нинг бўш корхоналари йўқ, шунингдек, умуман сотиш масаласи ҳам турибди», — деди у.
Подмосковьедаги завод, унинг фикрича, маҳсулотларни Россия ва яқин хориж мамлакатларида сотиш учун мослаштирилганди, аммо уларнинг аксарият қисми айнан Россия учун ишлаб чиқарилган. «Россияга етказиб беришлар тўсиб қўйилган тақдирда, ишлаб чиқаришни тўрт-беш марта қисқартиришга тўғри келади», — деди Погудалов.
«Коммерсантъ»нинг Қозоғистон бозоридаги манбасига кўра, Artel учун LG билан ҳамкорлик қилиш манфаатли эмас, чунки у ҳолда, корейс бренди Artel’нинг ўзига рақобатчи бўлади.
Изоҳ (0)