Зеленский Россия Херсондаги Каховка ГЭСда теракт тайёрлаётганини айтди

Россия ҳарбийлари Херсон вилоятидаги Каховка гидроэлектр станциясида теракт тайёрламоқда, деб маълум қилди Украина президенти Владимир Зеленский.

«Биздаги маълумотларга кўра, Каховка ГЭС блоклари ва дамбаси Россия террорчилари томонидан миналанган», — деди Украина президенти урушнинг 239-куни якунлари бўйича халққа мурожаатида.

20 октябрь куни у Брюсселдаги Европа кенгаши йиғилишида онлайн иштироки давомида ҳам шу ҳақда гапирган. Унинг сўзларига кўра, Россия армияси назорати остидаги Каховка ГЭСнинг дамбасида тахминан 18 миллион куб метр сув бор ва агар у портлатиб юборилса, 80 дан ортиқ аҳоли пунктлари, жумладан Херсон ҳам қисқа вақтда сув остида қолади.

Зеленский жаҳон ҳамжамиятини эҳтимолий терактга олдиндан жавоб беришга ҳамда ГЭСга халқаро кузатув миссиясини юборишга чақирди.

Дамбани бузиш кенг кўламли фалокатни англатади. Албатта, босқинчиларга Украина ҳудудига нима бўлишининг аҳамияти йўқлигини тушунамиз. Ушбу теракт билан улар, жумладан, Днепрдан Қримга сув етказиб бериш имкониятини ҳам йўқ қилиши мумкин. Каховка ГЭС дамбасининг вайрон бўлиши билан Шимолий Қрим канали шунчаки йўқ бўлиб кетади. Агар Россия шундай террорчилик ҳаракатини тайёрлаётган бўлса, бундай сценарийни жиддий ўйлаб кўраётган бўлса, демак, террорчилар нафақат Херсонни, балки бутун мамлакатимиз жанубини, жумладан, Қримни ҳам ушлаб тура олмаслигини жуда яхши тушунмоқда, — деди Зеленский ўз мурожаатида.