22 та мамлакат Эронда ишлаб чиқарилган жанговар учар қурилмаларни сотиб олиш учун расмий талабномалар берган. Бу ҳақда Эрон олий раҳнамоси оятуллоҳ Хомейнийнинг бош ҳарбий ёрдамчиси ва Ислом инқилоби посбонлари корпуси собиқ қўмондони генерал майор Яҳё Раҳим Сафавий маълум қилди, деб ёзади EADaily.
«Эрон учувчисиз учар қурилмаларни сотиб олиш учун даъвогар мамлакатлар ҳозирча Арманистон, Тожикистон, Сербия, Жазоир, Венесуэла ва бошқалар», — деди Сафавий.
Унинг қўшимча қилишича, 1979 йилги Ислом инқилобигача Эрон ўз ҳарбий эҳтиёжларининг 80 фоизини хориждан, биринчи навбатда, АҚШ ва бошқа Ғарб мамлакатларидан импорт қилган, аммо энди Ислом республикаси ҳамма нарсани ўзи ишлаб чиқармоқда.
Тожикистоннинг тегишли тузилмалари ушбу маълумотни тасдиқлаганича йўқ.
Жорий йил майида Эроннинг IRNA ахборот агентлиги Тожикистонда Эроннинг Абабил-2 учувчисиз учар қурилмаларини ишлаб чиқариш бўйича корхона очилганини маълум қилганди. Ўшанда очилишда Тожикистон мудофаа вазири Шерали Мирзо ва Эрон Қуролли кучлари Бош штаби бошлиғи Муҳаммад Бокирий қатнашгани хабар берилганди.
Аммо Тожикистон томони бу ҳақда расмий маълумот эълон қилмаган.
Эрон учувчисиз учар қурилмаларни ишлаб чиқаришни 1980 йилларда бошлаган. Эрон учар қурилмалари ривожланишини Америка дронлари бошлаб берган, улар 1970 йилларда қабул қилиб олинган Fireбее ҳаво нишонлари бўлган.
Аввалроқ Қирғизистон Туркиянинг Акıнcı моделидаги Bayraktar тезкор-тактик ўрта баландликка парвоз қилувчи учувчисиз учар қурилмасини ўз арсеналига қабул қилиб олган эди.
Ижтимоий тармоқларда тарқалган хабарларга кўра, Туркияда ишлаб чиқарилган зарбдор дронлар сентябрь ўрталарида Тожикистон билан чегарада юзага келган сўнгги зиддиятда қирғиз қўшинлари томонидан қўлланилган.
Изоҳ (0)