Европа Иттифоқи ташқи ишлар вазирлари Украинага 500 млн евролик янги ҳарбий ёрдамни маъқуллади

Европа Иттифоқи мамлакатлари ташқи ишлар вазирлари Украинага 500 миллион евро миқдоридаги олтинчи ҳарбий ёрдам пакетини тақдим этишни маъқуллади. Шунингдек, улар Украина ҳарбийлари учун ўқув миссиясини бошлашга келишиб олди. Шу тариқа ЕИдан Украинага берилаётган ҳарбий ёрдамнинг умумий миқдори 3,1 миллиард еврога етади.

ЕИ Кенгашининг пресс-релизида айтилишича, 490 миллион евро ҳарбий техникага сарфланади, яна 10 миллион евро зарур жиҳозлар, шахсий ҳимоя воситалари, биринчи тиббий ёрдам қутилари ва ёнилғи харажатларини қоплашга мўлжалланган. Европа дипломатияси раҳбари Жозеп Боррел «Европа Иттифоқи Украинани зарурат туғилганда қўллаб-қувватлашда давом этади», деб ваъда берди.

Украина ҳарбийларини тайёрлаш бўйича Европа Иттифоқи миссияси икки йил давом этади. Тахминий харажатлар 106,7 миллион еврога баҳоланмоқда.

«Миссия ЕИга аъзо давлатларнинг Украинани қўллаб-қувватлаш бўйича икки томонлама фаолияти, шунингдек, бошқа ҳамфикр халқаро ҳамкорлар билан мувофиқлаштиришни таъминлайди ва учинчи давлатларнинг иштироки учун очиқ бўлади», — деб тушунтирди Европа Иттифоқи кенгаши.

Боррел Украинага 500 миллион евро Европа тинчлик фонди ҳисобидан ажратилишини айтган эди. Ўқув миссияси Европа Иттифоқида ноябрь ойининг ўрталаридан бошлаб ишга тушади, 15 мингга яқин украиналик аскарни тайёрлаш режалаштирилган. Тренинг ходимлари Польшага келиб жойлашади.

Financial Times’нинг ёзишича, Украина ЕИдан янада «барқарор ва олдиндан айтиб бўладиган» молиявий ёрдам талаб қилмоқда. Киев 2023 йилда халқаро ҳамкорларидан бюджет ёрдами сифатида 38 миллиард доллар ёки ойига тахминан 3,5 миллиард доллар олишни кутмоқда. Politico маълумотларига кўра, Европа Иттифоқида Украинага қурол етказиб бериш харажатларини қоплаш учун маблағ етишмаяпти.