Россиянинг Белгород вилояти қишлоқларидан бирида темир йўл вокзали ҳудуди снарядлар билан ўққа тутилди. Оқибатда поездлар ҳаракати вақтинча тўхтатилди. Бу ҳақда Белгород вилояти губернатори Вячеслав Гладков маълум қилди. Унинг айтишича, бир киши жароҳатланган, алоқа тармоғига зарар етган. Авария бригадалари ҳозирда отишма оқибатларини бартараф этмоқда.
Шу орада, қўшни Курск вилояти губернатори Роман Стартовойт Украина Қуролли кучлари томонидан Украина билан чегарадош ҳудудлардаги Теткино посёлкаси ва Попово-Лежачи қишлоғи ўққа тутилгани ҳақида маълум қилди. Унга кўра, вилоятда электр таъминотида узилишлар кузатилмоқда. Эҳтимолий қурбонлар ва вайроналар ҳақида ҳозирча маълумот олинмаган.
Украинада Россия босқини бошланганидан сўнг, Россиянинг чегара ҳудудларида террорчилик таҳдидининг «сариқ» даражаси жорий этилганди. Сўнгги кунларда Россиянинг Украина шаҳарларига ракета ҳужумлари фонида Белгород вилояти ҳудуди мунтазам равишда ўққа тутилмоқда. 13 октябрь куни Белгородда ҳаво ҳужумидан мудофаа ракетаси қулаши оқибатида кўп қаватли уй томининг бир қисми қулаб тушганди. 14-куни шаҳарда ўққа тутилиб электр подстанцияси, 15-куни эса нефтбазаси ёниб кетди.
Изоҳ (0)