Венесуэланинг Арагуа штатидаги Лас-Техериас шаҳрида кўчки ва сув тошқинлари қурбонлари сони 43 кишига етди. Бу ҳақда Associated Press маҳаллий ҳокимиятга таяниб, хабар бермоқда.
Аввалроқ 37 киши ҳалок бўлгани ҳақида хабар берилганди. Расмийларнинг огоҳлантиришича, уларнинг сони ортиши мумкин — қутқарувчилар шаҳар кўчаларини вайроналар ва чиқиндилардан тозалаш мобайнида дарёдан 2 км узоқликда жойлашган қуйи оқимга томон ҳаракатланмоқда. Дастлабки маълумотларга кўра, 56 киши бедарак йўқолган.
Шаҳар кварталларини тозалаш учун оғир техникалар қўлланилмоқда, қурбонларни қидириш учун дронлардан фойдаланилмоқда, шунингдек, махсус ўқитилган итлар ҳам жалб этилган. Маҳаллий аҳоли омон қолганлар ва ёрдамга муҳтожларни қидиришда ёрдам бермоқда.
Лас-Техериас аҳолиси 50 минг кишидан иборат. Шаҳарда ҳозир 317 та уй бутунлай вайрон бўлган, яна 750 таси жиддий зарар кўрган.
Кўчки ва сув тошқинлари Венесуэлада ўтган ҳафта охирида ёғган кучли ёмғир сабаб юзага келган.
Изоҳ (0)