Қосим-Жўмарт Тўқаев Қозоғистон президенти лавозимига навбатдан ташқари сайловларда қатнашиш учун номзод сифатида рўйхатга олинди. Бу ҳақда Марказий сайлов комиссияси раиси Нурлан Абдиров маълум қилди, деб ёзади Tengrinews.
Президентликка номзод гувоҳномаси Тўқаевнинг ишончли вакили Ерлан Кошановга топширилди.
21 октябрь куни 18:00 да сайловолди ташвиқоти бошланиб, 19 ноябрь 00:00 га қадар давом этади. 19 ноябрь — жимжитлик куни.
11 октябрь куни Қозоғистон Марказий сайлов комиссияси республика президенти лавозими учун курашиш ниятида бўлганлардан аризалар қабул қилишни якунлади.
«Марказий сайлов комиссиясига республика жамоатчилик бирлашмалари томонидан илгари сурилган 12 нафар номзоддан ҳужжатлар тақдим этилди», — деди МСК котиби Мухтар Ерман 12 октябрь кунги мажлисда.
Қозоғистонда 20 ноябрь куни навбатдан ташқари президентлик сайлови ўтказилади. Қозоғистон президенти Қосим-Жўмарт Тўқаев шу йил кузда навбатдан ташқари президент сайловларини ўтказиш таклифини 1 сентябрь куни халққа йўллаган мурожаатида билдирганди. Президентлик мандатини етти йиллик битта муддат билан чеклашни ва қайта сайланишни тақиқлашни ҳам ўша мурожаатида таклиф қилганди.
20 ноябрь куни овоз бериш маҳаллий вақт билан 07:00 дан 20:00 гача бўлиб ўтади. Маъмурий-ҳудудий бирликлар бўйича овозларни ҳисоблаш натижалари ҳудудий сайлов комиссиялари томонидан амалга оширилади ва икки кун муддатда, яъни 22 ноябрга қадар Марказий сайлов комиссиясига етказилади.
Изоҳ (0)