Қозоғистон Марказий сайлов комиссияси республика президенти лавозими учун курашиш ниятида бўлганлардан аризалар қабул қилишни якунлади, деб хабар беради «Интерфакс».
«Марказий сайлов комиссиясига республика жамоатчилик бирлашмалари томонидан илгари сурилган 12 нафар номзоддан ҳужжатлар тақдим этилди», — деди МСК котиби Мухтар Ерман 12 октябрь кунги мажлисда.
Унинг сўзларига кўра, номзодларнинг қонунчилик талабларига мувофиқлигини текшириш ишлари яқин кунларда тугайди.
Номзодларни илгари суриш 23 сентябрда бошланиб, 11 октябрь куни 18:00 да якунланган.
Президентликка номзод сифатида рўйхатга ўтиш учун қуйидагилар МСКга ўз ҳужжатларини тақдим этди:
- амалдаги давлат раҳбари Қосим-Жўмарт Тўқаев, у жамоатчилик-сиёсий кучлар халқ коалициясидан илгари сурилди;
- Нурлан Ауесбаев, мухолифатчи Умуммиллий социал-демократик партия вакили;
- Мейрам Кажикен, «Аманат» республика касаба уюшмалари бирлашмаси вакили;
- Жигули Дайрбаев, «Ауил» халқ-демократик ватанпарварлик партиясидан;
- Нуржан Алтаев, «Мукалмас» республика жамоатчилик бирлашмасидан;
- Каракат Абден, ижтимоий хизматчилар миллий альянсидан;
- Талгат Ергалиев, «Қозоғистон қурувчилар иттифоқи» раҳбари;
- Жуматай Алиев, «Халқ демографияси» жамоатчилик бирлашмаси вакили;
- Хайрулла Габжалилов, «Асар» оралманлар республика жамоатчилик бирлашмаси вакили;
- Салтанат Турсинбекова, «Қозоқ оналари — анъаналарга йўл» жамоатчилик бирлашмаси вакили, ҳуқуқ ҳимоячиси;
- Бакит Жанабаев, «Қозоғистон футбол ҳаваскорлари лигаси» вакили, давлат даромадлари департаменти ходими;
- Фотима Бизакова, «Амалий психология» жамоатчилик бирлашмаси вакили.
Даъвогарлар қандай талабларни бажариши керак?
Навбатдан ташқари президент сайловлари 20 ноябрга белгиланган. Номзодлар исм-шарифлари сайлов бюллетенларига киритилишидан олдин улар Қозоғистон қонунчилиги томонидан белгиланган бир қатор талабларни бажариши керак.Биринчидан, улар давлат тили — қозоқ тили бўйича имтиҳон топшириши керак. Иккинчидан, энг кам иш ҳақининг 50 баробари — 6,5 минг евро миқдорида сайлов бадалини тўлаши керак. Агар номзод камида 5 фоиз сайловчилар овозини тўпласа, бу пул қайтариб берилади. Учинчидан, даъвогар ва унинг турмуш ўртоғи даромадлари, активлари ва мажбуриятлари ҳақида давлат органлари томонидан тасдиқланган декларациялар топширилиши керак.
Энг асосийси эса сайловда қатнашишга рухсат берилган эҳтимолий номзодлар ўн кун давомида, яъни 21 октябрга қадар овоз бериш ҳуқуқига эга Қозоғистон фуқароларидан камида 118 мингта (барча сайловчиларнинг 1 фоизи) имзо йиғиши керак.
Ғалаба имконияти кимда кўпроқ?
Сайлов кампанияси ибтидосини диққат билан кузатаётган қозоғистонлик экспертлар қайд этишича, амалдаги президент Тўқаевдан ташқари, 2—3 нафар, энг кўпи билан тўрт нафар номзод сайловчиларнинг расмий кўмагига эга бўлиши мумкин.МСК топшириғини ўзининг украинпараст позицияси ва Михаил Саакашвили билан иноқлиги орқали танилган парламент қуйи палатаси собиқ депутати Нуржан Алтаев, Қозоғистон касаба уюшмалари ҳамдўстлиги вакили Мейрам Кажикен ва президент сайловида илгари қатнашган академик Жуматай Алиев бажариши мумкин. Қолган даъвогарларни мамлакат аҳолиси деярли танимайди, дейди экспертлар.
Эслатиб ўтамиз, Қозоғистонда 20 ноябрь куни навбатдан ташқари президентлик сайлови ўтказилади. Қозоғистон президенти Қосим-Жўмарт Тўқаев шу йил кузда навбатдан ташқари президент сайловларини ўтказиш таклифини 1 сентябрь куни халққа йўллаган мурожаатида билдирганди. Президентлик мандатини етти йиллик битта муддат билан чеклашни ва қайта сайланишни тақиқлашни ҳам ўша мурожаатида таклиф қилганди.
Изоҳ (0)