Qozog‘iston prezidenti lavozimiga 12 nafar nomzod ilgari surildi

Qozog‘iston Markaziy saylov komissiyasi respublika prezidenti lavozimi uchun kurashish niyatida bo‘lganlardan arizalar qabul qilishni yakunladi, deb xabar beradi “Interfaks”.

“Markaziy saylov komissiyasiga respublika jamoatchilik birlashmalari tomonidan ilgari surilgan 12 nafar nomzoddan hujjatlar taqdim etildi”, — dedi MSK kotibi Muxtar Yerman 12-oktabr kungi majlisda.

Uning so‘zlariga ko‘ra, nomzodlarning qonunchilik talablariga muvofiqligini tekshirish ishlari yaqin kunlarda tugaydi.

Nomzodlarni ilgari surish 23-sentabrda boshlanib, 11-oktabr kuni 18:00 da yakunlangan.

Prezidentlikka nomzod sifatida ro‘yxatga o‘tish uchun quyidagilar MSKga o‘z hujjatlarini taqdim etdi:

• amaldagi davlat rahbari Qosim-Jo‘mart To‘qayev, u jamoatchilik-siyosiy kuchlar xalq koalitsiyasidan ilgari surildi;
• Nurlan Auyesbayev, muxolifatchi Umummilliy sotsial-demokratik partiya vakili;
• Meyram Kajiken, “Amanat” respublika kasaba uyushmalari birlashmasi vakili;
• Jiguli Dayrbayev, “Auil” xalq-demokratik vatanparvarlik partiyasidan;
• Nurjan Altayev, “Mukalmas” respublika jamoatchilik birlashmasidan;
• Karakat Abden, ijtimoiy xizmatchilar milliy alyansidan;
• Talgat Yergaliyev, “Qozog‘iston quruvchilar ittifoqi” rahbari;
• Jumatay Aliyev, “Xalq demografiyasi” jamoatchilik birlashmasi vakili;
• Xayrulla Gabjalilov, “Asar” oralmanlar respublika jamoatchilik birlashmasi vakili;
• Saltanat Tursinbekova, “Qozoq onalari — an’analarga yo‘l” jamoatchilik birlashmasi vakili, huquq himoyachisi;
• Bakit Janabayev, “Qozog‘iston futbol havaskorlari ligasi” vakili, davlat daromadlari departamenti xodimi;
• Fotima Bizakova, “Amaliy psixologiya” jamoatchilik birlashmasi vakili.

Da’vogarlar qanday talablarni bajarishi kerak?

Navbatdan tashqari prezident saylovlari 20-noyabrga belgilangan. Nomzodlar ism-shariflari saylov byulletenlariga kiritilishidan oldin ular Qozog‘iston qonunchiligi tomonidan belgilangan bir qator talablarni bajarishi kerak.

Birinchidan, ular davlat tili — qozoq tili bo‘yicha imtihon topshirishi kerak. Ikkinchidan, eng kam ish haqining 50 barobari — 6,5 ming yevro miqdorida saylov badalini to‘lashi kerak. Agar nomzod kamida 5 foiz saylovchilar ovozini to‘plasa, bu pul qaytarib beriladi. Uchinchidan, da’vogar va uning turmush o‘rtog‘i daromadlari, aktivlari va majburiyatlari haqida davlat organlari tomonidan tasdiqlangan deklaratsiyalar topshirilishi kerak.

Eng asosiysi esa saylovda qatnashishga ruxsat berilgan ehtimoliy nomzodlar o‘n kun davomida, ya’ni 21-oktabrga qadar ovoz berish huquqiga ega Qozog‘iston fuqarolaridan kamida 118 mingta (barcha saylovchilarning 1 foizi) imzo yig‘ishi kerak.

G‘alaba imkoniyati kimda ko‘proq?

Saylov kampaniyasi ibtidosini diqqat bilan kuzatayotgan qozog‘istonlik ekspertlar qayd etishicha, amaldagi prezident To‘qayevdan tashqari, 2—3 nafar, eng ko‘pi bilan to‘rt nafar nomzod saylovchilarning rasmiy ko‘magiga ega bo‘lishi mumkin.

MSK topshirig‘ini o‘zining ukrainparast pozitsiyasi va Mixail Saakashvili bilan inoqligi orqali tanilgan parlament quyi palatasi sobiq deputati Nurjan Altayev, Qozog‘iston kasaba uyushmalari hamdo‘stligi vakili Meyram Kajiken va prezident saylovida ilgari qatnashgan akademik Jumatay Aliyev bajarishi mumkin. Qolgan da’vogarlarni mamlakat aholisi deyarli tanimaydi, deydi ekspertlar.

Eslatib o‘tamiz, Qozog‘istonda 20-noyabr kuni navbatdan tashqari prezidentlik saylovi o‘tkaziladi. Qozog‘iston prezidenti Qosim-Jo‘mart To‘qayev shu yil kuzda navbatdan tashqari prezident saylovlarini o‘tkazish taklifini 1-sentabr kuni xalqqa yo‘llagan murojaatida bildirgandi. Prezidentlik mandatini yetti yillik bitta muddat bilan cheklashni va qayta saylanishni taqiqlashni ham o‘sha murojaatida taklif qilgandi.