Россия Федерал хавфсизлик хизмати Қрим кўпригидаги портлаш юзасидан қўзғатилган жиноий иш доирасида беш нафар россиялик, уч нафар украиналик ва арманистонлик фуқаролар қўлга олинганини маълум қилди. Улар жиноятни тайёрлашда иштирок этганликда гумонланмоқда, деб ёзади Meduza.
«ФХХ ва Россия Тергов қўмитаси Қрим кўпригидаги теракт ташкилотчиси Украина Мудофаа вазирлигининг Бош разведка бошқармаси, унинг бошлиғи Кирилл Буданов, ходимлари ва агентлари бўлганини аниқлади», — дейилади Россия разведка хизмати хабарида.
Идоранинг қўшимча қилишича, терговчилар ҳодисага алоқадорликда гумонланган 12 кишини аниқлаган.
Тергов хулосасига кўра, кўприкда ёниб кетган портловчи қурилма умумий оғирлиги 22 770 килограмм бўлган 22 дона яшиклар орасида қурилиш полиэтилен плёнкаси билан ўралган рулонларда бекитиб қўйилган. ФХХ маълумотларига кўра, бомба август ойи бошида Одессадан Болгарияга, у ердан Арманистон, Грузия ва кейин Россияга юборилган.
8 октябрь куни эрталаб Қрим кўпригида юк машинаси портлаб кетди. Оқибатда кўприкнинг автомобиллар юрадиган қисмида бир нечта таянчлар оралиғи қулаб тушди, шунингдек, кўприкдаги темир йўл орқали кетаётган цистернали таркиб ёниб кетди. Ёнғин оқибатида бир километрдан ортиқ темир йўл (кўприк узунлиги тахминан 19 километр) зарар кўрган. Сўнгги маълумотларга кўра, тўрт киши ҳалок бўлган.
Изоҳ (0)