Polsha fuqarosi Qozog‘iston prezidenti lavozimiga o‘z nomzodini qo‘yishga urindi

Polsha fuqarosi bo‘lgan ayol Qozog‘iston prezidenti sayloviga o‘z nomzodini qo‘yishga urindi, deb xabar bermoqda mamlakat Markaziy saylov komissiyasi.

Polsha fuqarosi Balli Majets Qozog‘iston prezidenti lavozimi uchun o‘z nomzodini ilgari surishi haqidagi ariza bilan Markaziy saylov komissiyasiga bir necha marta murojaat qilgan.

“Shu munosabat bilan, Polsha fuqarosiga amaldagi qonunchilik me’yorlari, xususan, Konstitutsiyada va “Qozog‘iston Respublikasidagi saylovlar to‘g‘risida”gi Konstitutsiyaviy qonunda respublika prezidentligiga nomzod uchun qo‘yilgan talablar haqida tushuncha berildi”, — deyiladi idora xabarida.

Qayd etilishicha, Konstitutsiyaning 41-moddasi 2-bandiga muvofiq, respublika fuqarosi bo‘lib tug‘ilgan, 40 yoshdan oshgan, davlat tilini yaxshi biladigan, so‘nggi 15 yil ichida Qozog‘istonda yashab kelayotgan va oliy ma’lumotga ega bo‘lganlargina Qozog‘iston Respublikasi prezidenti bo‘lishi mumkin. Konstitutsiyaviy qonun bilan prezidentlikka nomzodlarga qo‘shimcha talablar belgilanishi mumkin.

Shuningdek, Markaziy saylov komissiyasi xabariga ko‘ra, “Qozog‘iston Respublikasidagi saylovlar to‘g‘risida”gi qonunning 54-moddasi 1-bandiga ko‘ra, prezident etib saylanishi uchun, fuqaro kamida besh yil davlat xizmatida yoki saylanadigan davlat lavozimlarida ishlagan bo‘lishi kerak hamda faol saylov huquqiga ega bo‘lishi kerak.

Eslatib o‘tamiz, Qozog‘istonda 20-noyabr kuni navbatdan tashqari prezidentlik saylovi o‘tkaziladi. Qozog‘iston prezidenti Qosim-Jo‘mart To‘qayev shu yil kuzda navbatdan tashqari prezident saylovlarini o‘tkazish taklifini 1-sentabr kuni xalqqa yo‘llagan murojaatida bildirgandi. Prezidentlik mandatini yetti yillik bitta muddat bilan cheklashni va qayta saylanishni taqiqlashni ham o‘sha murojaatida taklif qilgandi.