Туркманистон президенти Сердар Бердимуҳамедов мамлакат Украина билан алоқаларни кенгайтиришдан манфаатдор эканини маълум қилди. Бу ҳақда «Нейтралний Туркменистан» ҳукумат газетаси хабар берди.
Бердимуҳамедов ўзи ва Туркманистон халқи номидан украиналикларни икки давлат ўртасида дипломатик муносабатлар ўрнатилганининг 30 йиллиги билан табриклади. Унинг қўшимча қилишича, томонлар ўзаро ҳурмат, тенглик ва ўзаро ишонч асосида ҳамкорлик қилади.
Давлат раҳбари Туркманистон икки томонлама алоқаларни кенгайтиришдан манфаатдор эканини қўшимча қилди. У биргаликдаги саъй-ҳаракатлар туфайли мамлакатлар ўртасидаги ҳамкорлик бундан буён ҳам ҳар икки халқ манфаатлари йўлида ривожланиб боришига ишонч билдирди.
Август ойида Бердимуҳамедов Украина президенти Владимир Зеленский ва бутун Украина халқини Мустақиллик куни билан табриклаган эди. У Зеленскийга сиҳат-саломатлик, бахт-саодат, Украина халқига эса барқарорлик ва фаровонлик тилаган.
Изоҳ (0)