To‘qayev prezident sayloviga o‘z nomzodini “jamoatchilik-siyosiy kuchlar keng koalitsiyasi” nomidan qo‘ymoqchi

Qozog‘iston prezidenti Qosim-Jo‘mart To‘qayevning fikricha, u saylovda “qandaydir muayyan tashkilot” emas, balki “jamoatchilik-siyosiy kuchlar keng koalitsiyasi” nomidan qatnashsa, to‘g‘ri bo‘ladi. Bu haqda u Pavlodar viloyatiga ishchi safari chog‘ida ma’lum qildi, deb yozadi Asia Plus.

“Ko‘rib turibman, bo‘lg‘usi saylovlarda qaysi birlashmadan nomzodimni qo‘yishim jamoatchilikda alohida qiziqish uyg‘otmoqda. Ochiq-oydin aytaman — menga turli respublika birlashmalaridan va partiyalardan ularning nomzodi bo‘lish haqida takliflar kelib tushmoqda”, — dedi To‘qayev.

Uning aytishicha, “bularning barchasi fuqarolarning amalga oshirilayotgan va belgilangan o‘zgarishlarni qo‘llab-quvvatlash darajasi uch yarim yil ichida ancha o‘sganidan darak beradi”.

“O‘ylaymanki, saylovga qandaydir muayyan tashkilotdan emas, balki mamlakatda olib borilayotgan islohotlarning ijtimoiy bazasini shakllantiruvchi jamoatchilik-siyosiy kuchlar keng koalitsiyasidan qatnashsam to‘g‘ri bo‘ladi. Shuningdek, bu davlat rahbarining turli partiya va birlashmalardan teng uzoqlikda bo‘lish tamoyilini yana bir bor tasdiqlash imkonini beradi”, — dedi To‘qayev.

U davlat rahbari sifatida “prezident saylovi halol, ochiq va adolatli o‘tishini kafolatlash”ga va’da berdi. Shuningdek, To‘qayevning fikricha, prezident saylovi arafasidagi saylov kampaniyasi “sur’atlari oshmoqda”. “Ichki siyosat maydonidagi jonlanish ko‘zga yaqqol tashlanmoqda”, — dedi u.

Ayni paytga qadar prezident lavozimiga to‘rt kishi da’vogar bo‘lgani ma’lum. Bular “Auil” partiyasidan Jiguli Dayrabayev, OSDP partiyasidan Nurlan Auyesbayev, “Amanat” kasaba uyushmalari hamdo‘stligidan Meyram Kajiken. Shuningdek, Polsha fuqarosi Balli Majets bir necha marta hujjatlarini topshirishga uringan.

To‘qayevning “jamoatchilik-siyosiy kuchlar keng koalitsiyasi”dan nomzodini qo‘yish niyati haqidagi bayonoti bir qator respublika tashkilotlari uni prezidentlikka nomzodlar qatorida ko‘rishni istashini aytganidan keyin yangradi. Xususan, Milliy ko‘ngillilar tarmog‘i, Qozog‘iston fuqarolik alyansi, Qazaqstan Team yoshlar birlashmasi, Faxriylar tashkiloti va Qozog‘iston sportchilar ittifoqi shunday tashabbus bilan chiqqan.

Eslatib o‘tamiz, Qozog‘istonda 20-noyabr kuni navbatdan tashqari prezidentlik saylovi o‘tkaziladi. Qozog‘iston prezidenti Qosim-Jo‘mart To‘qayev shu yil kuzda navbatdan tashqari prezident saylovlarini o‘tkazish taklifini 1-sentabr kuni xalqqa yo‘llagan murojaatida bildirgandi. Prezidentlik mandatini yetti yillik bitta muddat bilan cheklashni va qayta saylanishni taqiqlashni ham o‘sha murojaatida taklif qilgandi.