Аввалроқ «иложи борича кўпроқ русларни ўлдириш»га чақирган Украина элчиси Пётр Vрублёвский Остонага қайтиб келгани туфайли, Россия Ташқи ишлар вазирлиги (ТИВ) вакили Мария Захарова айтган гаплар учун Россия элчиси Алексей Бородавкин Қозоғистон ТИВга чақирилди. Бу ҳақда Қозоғистон дипломатик идораси вакили Айбек Смадияров маълум қилди.
Захарова Қозоғистонни «бандеровчи эмиссар ҳеч қачон Остонага қайтмаслиги» ҳақидаги ваъдасини бузганликда айблаганди. Шунингдек, у Қозоғистон элчиси Ермек Кошербаев Россия ТИВга чақирилиб, унга бундай вазият номақбуллиги тушунтирилганини айтди.
Смадияровнинг сўзларига кўра, Захарова изоҳларининг оҳанги «Қозоғистон ва Россиянинг тенг ҳуқуқли стратегик шериклар сифатидаги иттифоқдошлик муносабатлари хусусияти била уйғун эмас», шу муносабат билан Қозоғистон ТИВ 5 октябрь, чоршанба куни Россия элчисини «суҳбат учун» чақиради.
Шу билан бирга, Смадияров Украина элчиси тез орада алмаштирилишини, чунки Қозоғистон томони Россия ҳақидаги гаплари учун унинг мақомини «номақбул» деб ҳисоблашини айтди.
«Айни пайтда Украина ТИВдан Остонада янги элчини тайинлаш ҳақида сўров олинди. Қайд этишим керак, Украина томони билан бу масалада тўлиқ ҳамжиҳатлигимиз бор», — дея қўшиб қўйди Қозоғистон ТИВ вакили.
Украина элчиси нима деганди?
Украинанинг Қозоғистондаги элчиси Пётр Vрублёвский қозоғистонлик блогер Диас Кузаировга берган интервьюсида Украинанинг мақсади — иложи борича кўпроқ русларни ўлдириш эканини айтганди.Vрублёвскийнинг интервьюсидан парча 22 август куни Россия ТИВ расмий вакили Мария Захарованинг Telegram-каналида эълон қилинди. Ушбу видеода Vрублёвский Украина «иложи борича кўпроқ русларни ўлдирмоқчилигини» айтган. Шунингдек, у: «Ҳозир биз русларни қанчалик кўп ўлдирсак, фарзандларимиз ўлдириши учун улар шунчалик кам қолади», — деган.
«Бундай гапни фақат террорчилик режими элчисигина айтиши мумкин. Саккиз йил давомида Киев нацистлари жимгина қотиллик қилиб, ҳамма нарсада Москвани айблаб келганди, энди эса миллий тозалаш режалари ҳақида баралла айтилмоқда», — дея изоҳ берди Захарова.
Россия Тергов қўмитаси видеога баҳо бериб, барча иштирокчиларнинг шахсларини текширишини ҳамда уларнинг аввалроқ россиялик ҳарбий хизматчиларга қарши амалга оширилган жиноятларга алоқадорлигини текширишини маълум қилди.
5 сентябрь куни эса Vрублёвский интервьюда айтган гаплари учун узр сўраб, таътилга чиқиб кетганди.
Изоҳ (0)