Президент администрацияси раҳбари Сардор Умурзоқов раҳбарлигида 27 сентябрь куни ўтказилган видеоселектор йиғилишда Асака тумани ҳокими Мансур Алихонов ишдан олинган.
Йиғилишда ер муносабатларини тартибга солишга оид қонунчилик ҳужжатларига риоя этмагани, фаолиятида йўл қўйган бошқа жиддий қонунбузилиш ҳолатлари учун Асака тумани ҳокими Мансур Алихонов лавозимидан озод этилган.
«Асака тумани ҳокими жаноб Алихонов. Ер ажратиш масаласида 56 та қарор билан 2 минг 390 гектар ер ноқонуний ажратилган. 2021—2022 йилларда, бир ярим йилнинг ичида ер билан боғлиқ ноқонуний ҳолатлар бўйича 15 та жиноий иш қўзғатилган. Шунинг учун бугун президентимизнинг қарорлари билан сиз ҳам лавозимингиздан озод этиласиз», — деган Сардор Умурзоқов.
Фақат ер ажратиш эмас, 2021 йилнинг декабрь ойида Асака тумани ҳокими Мансур Алихонов аҳоли билан номақбул тарзда суҳбатлашгани акс этган видео тарқалганди. Ҳолат ижтимоий тармоқларда кенг муҳокамаларга ва жамоатчиликнинг эътирозларига сабаб бўлганди.
Мансур Алихонов 2020 йилнинг сентябрь ойида Асака тумани ҳокими лавозимига тайинланган. У мазкур тайинловга қадар Жалақудуқ тумани ИИБ бошлиғи лавозимида фаолият юритган.
Аввалроқ видеоселектор йиғилишда айвонда ўтириб фуқаролар билан мулоқот қилгани учун Андижон тумани ҳокими, ер сотиш ишига аралашгани учун Фарғона тумани ҳокими ишдан олингани ҳақида хабар берилган эди.
Изоҳ (0)