Президент администрацияси раҳбари Сардор Умурзоқов бошчилигида 27 сентябрь куни бўлиб ўтган видеоселектор йиғилишда, лавозимига нолойиқ деб топилган Андижон тумани ҳокими Абдужаббор Эгамбердиев ишдан бўшатилган.
Эслатиб ўтамиз, август ойида Андижон тумани ҳокими Абдужаббор Эгамбердиевнинг ҳокимлик биноси ҳовлисида фуқаролар учун бўлиб ўтган сайёр қабули кенг муҳокамаларга сабаб бўлганди. Унда ҳоким айвон ичида ўтириб, фуқароларни эса айвонда ташқарига ўтқазиб мулоқот қилган. Буни ҳокимлик ижтимоий масофа сақлаш учун қилинган, деб изоҳлаган эди.
Селектор йиғилишида Сардор Умурзоқов ҳар бир ишдан олинган ҳокимларнинг йўл қўйган камчилик ва хатоларини бир-бир санаб берган. Собиқ ҳокимлар фаолиятига баҳо берилар экан, уларнинг хатти-ҳаракатлари кенг жамоатчилик эътирозларига сабаб бўлганига алоҳида эътибор қаратилган.
Йиғилишда Сардор Умурзоқов Андижон тумани ҳокимига «Эгамбердиев, жаноби олийлари, селектор йиғилишида айвонда ўтирмаяптиларми?» дея кесатиқ билан мурожаат қилган.
«Ҳамма кўрди. Бутун дунёга шарманда бўлдик. Айвонда ўтириб олиб, масофани сақлашни баҳона қилдингиз, ундай бўлса, нега сектор раҳбарларини ёнингизга ўтқазиб қўйдингиз? Фуқароларга нисбатан ҳурматсизлик, димоғдорлик, кибр-ҳаво. Бу нима деган гап? Бутун жамиятимиз, ижтимоий тармоқда қизғин муҳокама ва эътирозларга сабаб бўлди. Жамоатчилик олдида сиз ўзингизни эмас, Андижон тумани ҳокимлигини эмас, бутун давлат тизимини, бутун президент жамоасини обрўсизлантиришга олиб келдингиз. Шунинг учун ҳурматли президентимиз қарор қабул қилдилар: биринчидан, сиз эгаллаб турган лавозимингиздан бугун озод қилинасиз, иккинчидан, сизнинг бу хатти-ҳаракатингизга ҳуқуқий баҳо берилади», — деди Сардор Умурзоқов.
Эслатиб ўтамиз, ушбу видеоселектор йиғилишида раҳбарлик этикаси, хизмат ваколатидан четга чиқиш, фуқароларга ҳурматсизлик сабаб 5 та туман ҳокимлари ишдан бўшатилган.
Изоҳ (0)