Prezident administratsiyasi rahbari Sardor Umurzoqov rahbarligida 27-sentabr kuni o‘tkazilgan videoselektor yig‘ilishda Asaka tumani hokimi Mansur Alixonov ishdan olingan.
Yig‘ilishda yer munosabatlarini tartibga solishga oid qonunchilik hujjatlariga rioya etmagani, faoliyatida yo‘l qo‘ygan boshqa jiddiy qonunbuzilish holatlari uchun Asaka tumani hokimi Mansur Alixonov lavozimidan ozod etilgan.
“Asaka tumani hokimi janob Alixonov. Yer ajratish masalasida 56 ta qaror bilan 2 ming 390 gektar yer noqonuniy ajratilgan. 2021—2022-yillarda, bir yarim yilning ichida yer bilan bog‘liq noqonuniy holatlar bo‘yicha 15 ta jinoiy ish qo‘zg‘atilgan. Shuning uchun bugun prezidentimizning qarorlari bilan siz ham lavozimingizdan ozod etilasiz”, — degan Sardor Umurzoqov.
Faqat yer ajratish emas, 2021-yilning dekabr oyida Asaka tumani hokimi Mansur Alixonov aholi bilan nomaqbul tarzda suhbatlashgani aks etgan video tarqalgandi. Holat ijtimoiy tarmoqlarda keng muhokamalarga va jamoatchilikning e’tirozlariga sabab bo‘lgandi.
Mansur Alixonov 2020-yilning sentabr oyida Asaka tumani hokimi lavozimiga tayinlangan. U mazkur tayinlovga qadar Jalaquduq tumani IIB boshlig‘i lavozimida faoliyat yuritgan.
Avvalroq videoselektor yig‘ilishda ayvonda o‘tirib fuqarolar bilan muloqot qilgani uchun Andijon tumani hokimi, yer sotish ishiga aralashgani uchun Farg‘ona tumani hokimi ishdan olingani haqida xabar berilgan edi.
Izoh (0)