«Жаноб Мўминов, ёзмасангиз ҳам бўлади. Китобчангизни ёпинг, ручкангизни киссангизга солинг» — Фарғона тумани ҳокими ишдан бўшатилиб, гувоҳномаси олиб қўйилди (аудио)

Президент администрацияси раҳбари Сардор Умурзоқов бошчилигида 27 сентябрь куни бўлиб ўтган видеоселектор йиғилишда Фарғона тумани ҳокими Шуҳратжон Мўминов ишдан олинган.

Йиғилишда администрация раҳбари Шуҳратжон Мўминовга ер сотиш бўйича алоҳида жиноят иши очилганини эслатган.

«Фарғона тумани, Мўминов. Сиз жуда яхши биласиз, алоҳида жиноят иши қўзғатилган. Сизнинг туманингизда тендерсиз ер майдонларини ажратиш бўйича қарорлар чиқарилган. Унумдор бўлган 25 гектардан кўп ер майдонини бириктириш эвазига нималар бўлганини ҳам жуда яхши биласиз», — деган Сардор Умурзоқов.

Администрация раҳбари Шуҳратжон Мўминовга мурожаат қилар экан, унга ёзмаса ҳам бўлишини, китобчани ёпиб, ручкани киссасига солишини айтган.

«Ҳурматли президентимизнинг бугунги қарорлари билан Фарғона тумани ҳокими Мўминов эгаллаб турган лавозимидан озод этилди. Залдан чиқиб кетинг. Хайрулло Ҳайитбоевич (вилоят ҳокими), залдан чиқиб кетаётганда гувоҳномасини топширсин. Ҳали унинг жиноий жавобгарликка тортилиши ёки тортилмаслиги масаласи бўйича икки ҳафта ичида гаплашамиз», — деган администрация раҳбари.

Эслатиб ўтамиз, Шуҳратжон Мўминов 2020 йилнинг июль ойида Фарғона тумани ҳокими этиб тайинланган. Унга қадар Фарғона вилояти ички ишлар бошқармаси бошлиғи ўринбосари вазифасида ишлаган.

Аввалроқ айвонда ўтириб фуқароларни қабул қилган Андижон тумани ҳокими Абдужаббор Эгамбердиев ишдан бўшатилгани ҳақида хабар берилганди.