Чорвоқдаги дам олиш маскани аукционда 34 млрд сўмга сотилди

Тошкент вилояти, Бўстонлиқ туманидаги «Зумрад сервис»нинг бино ва иншоотлари кимошди савдосида сотилди. Лот маълумотлари «E-auksion» порталида эълон қилинган.

Лот аукционга Давлат активларини бошқариш агентлиги томонидан қўйилган.

Ер участкасининг умумий майдони — 7,04 гектар. Бинонинг майдони — 2 832 квадрат метр. Биноларда сув ва электр таъминоти мавжуд, газ ва канализация эса йўқ.

Аукционга қўйилган бино ва иншоотларнинг бошланғич баҳоси — 32,5 млрд сўм эди. 5-сентябр куни ўтказилган кимошди савдосида VIP Logistics компанияси лотни 34,1 млрд сўмга сотиб олди.

VIP Logistics компанияси 2011 йил августда рўйхатдан ўтказилган. Қўшма корхона автомобиль транспортида юк ташиш билан шуғулланади.

Компаниянинг устав фонди 2,7 млрд сўмни ташкил қилади. Раҳбар сифатида Дилмурод Раҳматуллаев кўрсатилган.

Аввалроқ компания «Пирамида» дам олиш масканини 208 млрд сўмга сотиб олгани ҳақида хабар берилганди.