20 сентябрь куни Хитойнинг Alibaba платформасида Ўзбекистон миллий павильонининг расмий очилиш маросими бўлиб ўтди. Бу ҳақда Инвестициялар ва ташқи савдо вазирлиги хабар бермоқда.
«Alibaba.com» йиллик айланмаси 106 миллиард долларни ташкил этадиган Хитойнинг етакчи савдо платформасидир. Унинг асосий фаолияти B2B шаклида компаниялар ўртасидаги савдо операциялари ва онлайн чакана савдони ташкил қилишдан иборат.
Ўзбекистон павильони МДҲ мамлакатлари орасида «Alibaba.com» сайтида Россия ва Қозоғистондан кейин учинчи бўлди.
Ўзбекистон миллий павильонига 4800 дан ортиқ турдаги товарларга эга 50 дан ортиқ маҳаллий компаниялар киради.
Эндиликда павильон янги маҳсулотлар билан мунтазам тўлдирилиб борилади. Бўлимдаги таклифлар автоматик равишда тартибланади ва сотувлар, мижозлар рейтинглари ва шарҳларнинг АI таҳлили орқали янгиланади.
Ҳар куни ушбу платформада ўзбекистонлик экспортчилар ва ишлаб чиқарувчиларнинг қатори кенгайиб бормоқда. 2022 йил охирига келиб улар сонини 100 тага етказиш режалаштирилган.
Корхоналар орасида янги ёки қуритилган мева ва сабзавотлар, тайёр тўқимачилик ва бошқа маҳсулотлар ишлаб чиқарувчилар, сайёҳлик хизматларини кўрсатувчи компаниялар бор.
Бугунги кунга қадар Alibaba орқали Ўзбекистон экспорти ҳажми 67,1 миллион долларга етди.
Alibaba ва Экспортни рағбатлантириш агентлиги 2021 йил июль ойида ҳамкорлик шартномасини имзолаган эди. Унинг доирасида Ўзбекистон платформада товарларни рўйхатдан ўтказиш учун 70 та корхонага 4,6 миллиард сўм молиявий кўмак кўрсатди.
Бундан ташқари, Alibaba имкониятларидан самарали фойдаланиш бўйича 4 та семинар бўлиб ўтди. Улардан 300 дан ортиқ корхона ўтган бўлса, йил охирига қадар 500 га яқин корхона ўтиши кутилмоқда.
Шунингдек, агентлик Alibaba Group билан ҳамкорликда Тошкент шаҳрида электрон тижорат форуми ҳамда экспортёрлар учун бир қатор семинарлар, тренинглар, маҳорат дарслари ва маслаҳатлар тайёрламоқда. Тадбирлар 8—15 октябрь кунлари бўлиб ўтади.
Изоҳ (0)