4,2 млрд сўмлик авторақамлар сотилган: Ўтган ҳафтада биржа савдоларида пасайиш кузатилди
19—23 сентябрь кунлари Ўзбекистон республика товар-хом ашё биржасининг барча савдо платформаларида 2,7 трлн сўмлик товарлар сотилган бўлиб, бу аввалги ҳафтага нисбатан 2,2 фоизга камдир. Бу ҳақда биржа матбуот хизмати хабар бермоқда.
Қайд этилишича, сотувларнинг:
- 81 фоизи — биржа савдолари;
- 18,6 фоизи электрон давлат харидлари;
- 0,2 фоизи — кўргазма-ярмарка савдолари;
- 0,2 фоизи авторақамларнинг онлайн-аукционига тўғри келди.
Кичик бизнес ва хусусий тадбиркорлик субъектлари иштирокида тузилган битимларнинг умумий ҳажми 644,2 млрд сўмни ташкил қилди.
Давлат харидлари тизимларида ўтказилган электрон савдолар натижасида бюджет ва корпоратив буюртмачиларининг қарийб 102,4 млрд сўмлик маблағлари тежалди.
Кўриб чиқилаётган давр мобайнида онлайн аукцион орқали 1 518 та авторақамлар сотилди. Сотилган давлат рақам белгиларининг умумий суммаси 4,2 млрд сўмни ташкил қилди.
Рақобатли савдолар натижасида битимларнинг:
- 5,3 фоизи — биринчи;
- 9,1 фоизи — иккинчи;
- 5,5 фоизи — учинчи;
- 7,4 фоиз — тўртинчи;
- 21 фоиз — бешинчи
- 51,6 фоиз — олтинчи тоифа авторақамларга тегишлидир.
Биржа савдолари
Кўриб чиқилаётган даврда очиқ биржа савдолари орқали жами 2,17 трлн сўмлик товар ресурслари сотилди.
Сотувчи корхоналар маҳсулотларни тасдиқланган жадвалларга риоя қилган ҳолда биржа савдоларига қўйишди, шу жумладан:
Суюлтирилган газ
Биржанинг суюлтирилган газ бозорида нархлар пасайиши қайд этилди. Ҳафта давомида биржа савдоларига 4 175 тонна суюлтирилган газ қўйилди ва ундан 3 229 тоннаси, яъни 77,3 фоиз қисми сотилди. Ўтказилган савдоларда ҳар куни ўртача 132 харидор иштирок этди.
Кўриб чиқилаётган даврда суюлтирилган газ бўйича шаклланган кунлик ўртача нархлар маҳсулотнинг бир тоннаси учун 4,1 млн сўмдан 3,9 млн сўмгача, яъни 4,6 фоизга пасайган.
Ўтказилган биржа савдолари натижасида суюлтирилган газ бўйича шаклланган ўртача ҳафталик нархи маҳсулотни бир тоннаси учун қарийб 4 млн сўмни сўмни ташкил этди.
Пахта толаси
Ўтган ҳафтада биржа савдоларида 1 988 тонна пахта толаси қўйилди ва ундан 1 926 тоннаси, яъни 96,9 фоиз қисми сотилди. Ўртача кунлик сотув ҳажмлари 385 тоннани ташкил қилди.
19—23 сентябрь кунлари барча навли пахта толасининг кунлик ўртача нархлари маҳсулотнинг бир тоннаси учун 24,8 млн сўмдан 22,2 млн сўмгача, яъни 10,5 фоизга пасайган.
Омухта ем
Ўтган ҳафта мобайнида биржа савдоларига 13 243 тонна омухта ем қўйилди ва ундан 11 462 тоннаси, яъни 86,5 фоиз қисми сотилди.
Кўриб чиқилаётган даврда омухта ем бўйича шаклланган кунлик ўртача нархлар маҳсулотнинг бир тоннаси учун 2,3 млн сўмдан 2,2 млн сўмгача, яъни 5,6 фоизга пасайди. Ўтказилган савдоларда ҳар куни ўртача 132 та харидор иштирок этди.
