Европа Иттифоқи Путиннинг таҳдидларидан кейин нефть нархини чеклашга шошилмоқда — Bloomberg

Европа Иттифоқи (ЕИ) Россияга қарши янги санкциялар пакети доирасида Россия нефтига нархнинг юқори чегарасини жорий этиш имкониятини ўрганмоқда. Бу ҳақда Bloomberg хабар берди.

Агентликка кўра, ЕИ давлатлари бу борада бир неча ҳафта ичида келишувга эришмоқчи.

Президент Владимир Путиннинг қисман сафарбарлик ҳақидаги қарори, шунингдек, Донбассни Россия таркибига қўшиш бўйича режалаштирилган референдумлар фонида янги чекловлар муҳокамаси тезлаштирилди.

Нархларнинг юқори чегараси бўйича келишиб олиш қийин, чунки Европа Иттифоқи мамлакатларида энергетикага бўлган эҳтиёж даражаси ҳар хил.

Бундан ташқари, нефтнинг рухсат этилган максимал нархи қанча бўлиши ва бу чора ЕИнинг 5 декабрдан кучга кирадиган Россия нефтига нисбатан аллақачон келишилган эмбаргоси ​​билан бирга қандай амалга оширилиши ҳозирча маълум эмас.

Европа Иттифоқи вакиллари дам олиш кунлари Европа комиссияси билан учрашиб, янги санкцияларни муҳокама қилади.

Bloomberg’га кўра, нефтга нисбатан чекловлардан ташқари яна бир қанча шахсларга, шунингдек, технологиялар ва ҳашаматли товарларга нисбатан санкциялар кўриб чиқилмоқда.

G7 давлатлари аллақачон Россия нефтининг нарх чегараси бўйича келишиб олган. Ушбу механизм доирасида 5 декабрдан Россия нефтини денгиз орқали ташишни тақиқлаш, 2023 йил 5 февралдан нефть маҳсулотларини ташишни тақиқлаш жорий этилади.

Европа Иттифоқининг 15 та давлати ҳам газ нархлари бўйича умумий чегарани белгилашни талаб қилди, бироқ бу борада келишиб бўлмади. Россия Энергетика вазирлиги газ ёки нефтни чекланган нархда сотишни истисно қилди.