Қозоғистон россияликларнинг мамлакатга киришини чекламасликка ваъда берди. Чегарадаги тирбандликлар давом этмоқда

Қозоғистон ҳукумати Россия фуқароларининг мамлакатга кириб келишини чекламайди, аммо истиқомат учун гувоҳнома тегишли ҳужжатлар тақдим этилганидан кейингина расмийлаштирилади. Бу ҳақда Сенат спикери Маулен Ашимбаев маълум қилди, деб ёзади Asia Plus.

«Агар россияликлар бизнинг мамлакатимизга келиб, сўнг кетмоқчи бўлса, қандайдир ишлар бўйича бу ерда қанчадир вақт бўлиб турмоқчи бўлса, ҳеч қандай муаммолар юзага келмаслиги керак, биз буни чеклай олмаймиз», — деди Ашимбаев журналистларнинг Россия фуқаролари Қозоғистонга оммавий равишда кириб келиши эҳтимоли ҳақидаги саволига жавобан.

Шу билан бирга, у Қозоғистонда истиқомат учун гувоҳнома олиш учун россияликлар ўз мамлакатидан чиқиш ҳақида рухсатнома, яъни кетиш варақасини тақдим этиши кераклигини таъкидлади. Агар бундай ҳужжати бўлмаса, лекин шахс мамлакатдан чиқиб кетган бўлса, у ҳолда Қозоғистон истиқомат учун гувоҳнома тақдим эта олмайди.

Ашимбаев, шунингдек, Қозоғистоннинг Россия ва Украина ўртасидаги низо бўйича позицияси ўзгармаганини қўшимча қилди. «Буни фақат сиёсий йўл билан, муросага келиш, ўзаро маъқул ечимларни қабул қилиш орқалигина ҳал этиш мумкин», — деди у.

Россиянинг Қозоғистон билан чегараси 7,5 минг километрга чўзилган бўлиб, бу унинг қуруқликдаги энг узун чегараси ҳисобланади.

Россияликлар сайёҳлик ва хизмат сафарлари бўйича Қозоғистонга ҳеч қандай чекловларсиз кириши мумкин, ҳатто ички паспорт билан ҳам.

Мамлакатда рўйхатдан ўтмасдан 30 кунгача яшаш мумкин, рўйхатдан ўтса — 90 кунгача (ундан кейин 90 кунга чиқиб кетиб, шундан сўнггина қайтиб кириш мумкин).

21 сентябрь куни Россия президенти Владимир Путин Россияда қисман сафарбарлик эълон қилиш ҳақидаги фармонни имзолади. «Ватанимиз, яхлитлигимизни ҳимоя қилиш учун қисман сафарбарликни қўллаб-қувватлаш зарур, деб ҳисоблайман», — деди Россия раҳбари.

Россия мудофаа вазири Сергей Шойгунинг айтишича, қисман сафарбарлик чоғида 300 минг захирадаги аскар чақирилади. Унинг сўзларига кўра, бу Россия сафарбарлик ресурсининг тахминан 1 фоизини ташкил қилади.

Сафарбарлик эълон қилинганидан кейин бир неча дақиқалар ичида Москвадан Истанбулга, Тбилисига ва Ереванга тўғридан-тўғри рейслар учун чипталар тўлиқ сотилиб кетган. Шунингдек, Москвадан Тошкентга рейслар чипталари ҳам қолмаган.

Россия ва Қозоғистон чегарасида эса катта тирбандликлар, бир неча километрга чўзилган навбатлар юзага келди.