Сўнгги ўн йил ичида Россияда фуқаролик олган марказий осиёликларга ҳарбий хизмат ўташ мажбурияти юкланиши мумкин. Бу ҳақда Россия президенти ҳузуридаги Инсон ҳуқуқлари бўйича кенгаш аъзоси Кирилл Кабанов маълум қилди.
«Россия президенти томонидан эълон қилинган қисман сафарбарлик доирасида Россия фуқаролигини олганига ўн йилдан ошмаган янги фуқаролар учун бир йил ичида мажбурий ҳарбий хизмат ўташ бўйича таклифлар тайёрлаяпмиз. Бу Марказий Осиё: Қозоғистон, Қирғизистон, Тожикистон ва Ўзбекистондан келганларга тегишли бўлади», — деб ёзди у ўз Telegram-каналида.
Унинг сўзларига кўра, ҳарбий мажбуриятни бажаришдан бош тортиш нафақат ҳарбий хизмат ёшидаги шахснинг, балки унинг бутун оила аъзоларининг Россия фуқаролигидан маҳрум этилишига олиб келиши керак.
«Ушбу ташаббуснинг амалга оширилиши юқорида тилга олинган мамлакатлар ҳукуматлари томонидан ўз фуқароларининг махсус ҳарбий операцияда кўнгилли равишда иштирок этиши тақиқланиб, бунинг учун жиноий жавобгарлик белгиланишига муносиб жавоб бўлади», — дея таъкидлади у.
20 сентябрь куни Россия Давлат думаси янги қонун қабул қилди, унга мувофиқ, армияда бор-йўғи бир йил хизмат қилганлар ушбу мамлакат фуқаролигини қўлга киритиши мумкин бўлади.
21 сентябрь куни Россия президенти Владимир Путин Россияда қисман сафарбарлик эълон қилиш ҳақидаги фармонни имзолади. «Ватанимиз, яхлитлигимизни ҳимоя қилиш учун қисман сафарбарликни қўллаб-қувватлаш зарур, деб ҳисоблайман», — деди Россия раҳбари.
Россия мудофаа вазири Сергей Шойгунинг айтишича, қисман сафарбарлик чоғида 300 минг захирадаги аскар чақирилади. Унинг сўзларига кўра, бу Россия сафарбарлик ресурсининг тахминан 1 фоизини ташкил қилади.
Шундан кейин Ўзбекистон Бош прокуратураси хориждаги ўзбекистонликларга мурожаат қилиб, уларни чет давлатлар ҳарбийлашган тузилмаларига ёлланиш жавобгарликка сабаб бўлишидан огоҳлантирганди. Шунингдек, Ўзбекистоннинг Россиядаги элчихонаси фуқароларни ҳарбий ҳаракатларда иштирок этмасликка чақирди.
Шунингдек, Коллектив хавфсизлик шартномаси ташкилоти аъзолари бўлган Қозоғистон, Қирғизистон ва Тожикистон ҳам ўз фуқароларининг Украинага қарши урушда иштирок этишига қарши чиқди.
Изоҳ (0)