Qozog‘iston hukumati Rossiya fuqarolarining mamlakatga kirib kelishini cheklamaydi, ammo istiqomat uchun guvohnoma tegishli hujjatlar taqdim etilganidan keyingina rasmiylashtiriladi. Bu haqda Senat spikeri Maulen Ashimbayev ma’lum qildi, deb yozadi Asia Plus.
“Agar rossiyaliklar bizning mamlakatimizga kelib, so‘ng ketmoqchi bo‘lsa, qandaydir ishlar bo‘yicha bu yerda qanchadir vaqt bo‘lib turmoqchi bo‘lsa, hech qanday muammolar yuzaga kelmasligi kerak, biz buni cheklay olmaymiz”, — dedi Ashimbayev jurnalistlarning Rossiya fuqarolari Qozog‘istonga ommaviy ravishda kirib kelishi ehtimoli haqidagi savoliga javoban.
Shu bilan birga, u Qozog‘istonda istiqomat uchun guvohnoma olish uchun rossiyaliklar o‘z mamlakatidan chiqish haqida ruxsatnoma, ya’ni ketish varaqasini taqdim etishi kerakligini ta’kidladi. Agar bunday hujjati bo‘lmasa, lekin shaxs mamlakatdan chiqib ketgan bo‘lsa, u holda Qozog‘iston istiqomat uchun guvohnoma taqdim eta olmaydi.
Ashimbayev, shuningdek, Qozog‘istonning Rossiya va Ukraina o‘rtasidagi nizo bo‘yicha pozitsiyasi o‘zgarmaganini qo‘shimcha qildi. “Buni faqat siyosiy yo‘l bilan, murosaga kelish, o‘zaro ma’qul yechimlarni qabul qilish orqaligina hal etish mumkin”, — dedi u.
Rossiyaning Qozog‘iston bilan chegarasi 7,5 ming kilometrga cho‘zilgan bo‘lib, bu uning quruqlikdagi eng uzun chegarasi hisoblanadi.
Rossiyaliklar sayyohlik va xizmat safarlari bo‘yicha Qozog‘istonga hech qanday cheklovlarsiz kirishi mumkin, hatto ichki pasport bilan ham.
Mamlakatda ro‘yxatdan o‘tmasdan 30 kungacha yashash mumkin, ro‘yxatdan o‘tsa — 90 kungacha (undan keyin 90 kunga chiqib ketib, shundan so‘nggina qaytib kirish mumkin).
21-sentabr kuni Rossiya prezidenti Vladimir Putin Rossiyada qisman safarbarlik e’lon qilish haqidagi farmonni imzoladi. “Vatanimiz, yaxlitligimizni himoya qilish uchun qisman safarbarlikni qo‘llab-quvvatlash zarur, deb hisoblayman”, — dedi Rossiya rahbari.
Rossiya mudofaa vaziri Sergey Shoyguning aytishicha, qisman safarbarlik chog‘ida 300 ming zaxiradagi askar chaqiriladi. Uning so‘zlariga ko‘ra, bu Rossiya safarbarlik resursining taxminan 1 foizini tashkil qiladi.
Safarbarlik e’lon qilinganidan keyin bir necha daqiqalar ichida Moskvadan Istanbulga, Tbilisiga va Yerevanga to‘g‘ridan to‘g‘ri reyslar uchun chiptalar to‘liq sotilib ketgan. Shuningdek, Moskvadan Toshkentga reyslar chiptalari ham qolmagan.
Rossiya va Qozog‘iston chegarasida esa katta tirbandliklar, bir necha kilometrga cho‘zilgan navbatlar yuzaga keldi.
Izoh (0)