Германия Қуролли кучлари — Бундесвер мамлакат мудофаа салоҳиятини мустаҳкамлаш мақсадида “Rheinmetall” компаниясидан қиймати 770 миллион еврога тенг бўлган харидни амалга оширди. Бу ҳақда Euronews хабар берди.
Савдо шартномасига кўра, компания армияга 1400 га яқин ҳарбий логистика транспортини тақдим этади. Буюртма таркибига 963 дона контейнер алмаштириш имконига эга транспорт воситалари (swap-body systems) ва 425 та зирҳсиз юк машиналари (UTV) киради. UTVлар нисбатан кам хавфли ҳудудларда фойдаланишга мўлжалланган.
“Rheinmetall” вакили ва ҳарбий транспорт бўлими бошқаруви раиси Андре Бартел баёнотда қуйидагиларни таъкидлади:
“Бундесвернинг ишончли ҳамкори сифатида қўшимча транспорт воситаларини етказиб бераётганимиздан мамнунмиз. Бу ҳарбий кучлар ҳаракатчанлиги ва жанговар тайёргарлигини оширишга хизмат қилади”.
Қўшимча қилинишича, буюртмалар 2025 йил охиригача етказиб берилади, ҳисоб-китоб эса 2025 йилнинг учинчи чорагида амалга оширилиши режалаштирилган.
Украинадаги уруш фонида мудофаа соҳасига эътибор кучайган
Россиянинг Украинага бостириб кириши Европада ҳарбий техника ва ускуналарга бўлган талабни кескин ошириб юборди. Айниқса, “Rheinmetall” компаниясининг акциялари 2025 йил бошидан бери 190 фоизга ошгани бунга яққол мисолдир.
АҚШ президенти Дональд Трамп ҳам Европа давлатларини мудофаа салоҳиятини оширишга чақирмоқда. Шу сабабли Германия ўзининг қатъий бюджет тартиб-қоидаларини юмшатишга ва ҳарбий харажатларни оширишга киришган.
ЯИМнинг 3,5 фоизи мудофаа учун ажратилади
Германия Бундесвернинг технологик янгиланишига жиддий эътибор қаратмоқда. Хусусан, Берлин 2029 йилгача мудофаа харажатларини ялпи ички маҳсулотнинг 3,5 фоизигача оширишни режалаштирган. Шунингдек, НАТО ҳам 2035 йилгача аъзо давлатлардан мудофаа харажатларини ЯИМнинг 5 фоизигача кўпайтришни талаб қилмоқда. Бу эса Европа бўйлаб қурол-яроғ ишлаб чиқарувчи компанияларга янги имкониятлар очиб беради.
Изоҳ (0)