Шавкат Мирзиёев Туркия президенти Ражаб Тоййиб Эрдўғон билан мамлакатлар ўртасидаги ўзаро манфаатли ҳамкорликнинг янги лойиҳалари ва истиқболли дастурларини муҳокама қилмоқда. Бу ҳақда президент матбуот котиби хабар берди.
Таъкидланишича, Эрдўғон Ўзбекистон раҳбарини ШҲТ саммити муваффақиятли ўтказилгани билан табриклаб, фахрий меҳмон сифатида иштирок этиш таклифи учун миннатдорлик билдирди. Учрашувда етакчилар ўзаро ҳурмат, дўстлик ва ишончга асосланган кўп қиррали Ўзбекистон–Туркия ҳамкорлигини фаоллаштириш масалалари юзасидан фикр алмашди.
Ўзаро муносабатлар ҳар томонлама стратегик шериклик даражасига кўтарилгани асносида сиёсий-дипломатик, парламентлараро, савдо-иқтисодий ва маданий-гуманитар алоқаларни яна-да чуқурлаштириш муҳимлиги алоҳида таъкидланди.
Томонлар 2022 йил 29–30 март кунлари Тошкентда олий даражадаги учрашувларда эришилган келишувларни амалга ошириш доирасида ўзаро мулоқотлар салмоқли даражада фаоллашганини қайд этди. Икки мамлакат ўртасидаги савдо кўрсаткичларида сезиларли ўсиш кузатилмоқда. Хусусан, 2021 йилда товар айирбошлаш 60 фоиздан ошди. Қўшма корхоналар сони 2 мингдан ортди. Биргина 2022 йилнинг ўтган даврида ярим миллиард долларга яқин инвестициялар ўзлаштирилди.
Туркия компаниялари Ўзбекистондаги давлат корхоналарини хусусийлаштириш жараёнида иштирок этишга катта қизиқиш билдирмоқда. Қишлоқ хўжалиги, транспорт, электротехника, тўқимачилик ва чарм саноати, инновациялар, юксак технологиялар, туризм ва маданият соҳаларида янги қўшма лойиҳаларни амалга оширишга келишиб олинди.
Истиқболли йўналиш сифатида энергетика тармоғи алоҳида қайд этилди. Кейинги йилларда томонлар қарийб 1 миллиард долларлик лойиҳаларни амалга оширмоқда. Учрашувда бўлажак тадбирлар, шу жумладан Самарқандда ўтказилиши режалаштирилган Туркий давлатлар ташкилоти саммитининг режаси кўриб чиқилди.
Изоҳ (0)