Тошкент халқаро аэропортида ноқонуний таксичилар билан боғлиқ муаммоларни бартараф этиш юзасидан топшириқлар берилди
Тошкент халқаро аэропортида расмий такси хизмати иш бошлаганидан сўнг ноқонуний такси ҳайдовчилари бир неча марта провокациялар уюштиргани ҳақида хабар берилган эди. Пойтахт ИИББ матбуот хизмати аниқланган муаммоларни бартараф этиш юзасидан тегишли топшириқлар берилганини маълум қилди.
Хабарда айтилишича, 15 сентябрь куни Тошкент шаҳар ИИББ бошлиғи генерал майор Азиз Ташпулатов ва «Тошшаҳартрансхизмат» АЖ бошқарув раиси Анвар Жўраев аэропорт ҳудуди атрофидаги йўловчи ташиш билан шуғулланувчи ҳайдовчилар билан учрашиб, профилактик суҳбат ўтказди.
Суҳбатдан сўнг аниқланган муаммоларни бартараф этиш юзасидан тегишли топшириқлар берилди.
Uzbekistan Airports акциядорлик жамияти бошқаруви раиси Раъно Жўраева аэропортда ноқонуний такси ҳайдовчилари билан боғлиқ муаммони бир кунда ҳал бўлмаслигини айтганди. «Муҳими, ҳозир бизни ҳуқуқ-тартибот идоралари қўллаб-қувватласа. Аэропорт муаммони бир ўзи ҳал қилолмайди», — деган эди у.
