Британиянинг The Sun нашрида эълон қилинган, гўёки, Россия президенти Владимир Путинга нисбатан суиқасд уюштирилгани ҳақидаги маълумот ҳақиқатга тўғри келмайди, дея маълум қилди давлат раҳбари матбуот котиби Дмитрий Песков.
Нашр Россия президентига яқин манбаларига таяниб ёзишича, Путиннинг кортежи 14 сентябрь куни Москвада «ҳужумга учраган»: президент лимузинининг олдинги чап ғилдирагидан «қаттиқ пақиллаш» овози эшитилган, шундан кейин «қуюқ тутун» пайдо бўлган. Газета маълумотларига кўра, хавфсиз жойга олиб ўтилган, Путинга жабр етмаган.
The Sun нашри маълумоти ҳақиқатга тўғри келадими, деган саволга Песков: «Йўқ», — деб жавоб берди.
2013 йил сентябрида Москва шаҳар суди Путинга нисбатан суиқасд ташкиллаштиришда айбланган қозоғистонлик Иля Пянзинни ўн йиллик қамоққа ҳукм қилганди. Тергов версиясига кўра, Адам Осмаев ва Руслан Мадаев 2011 йил декабрида Украинада Пянзинга Россияда тақиқланган «Имарат Кавказ» террорчилик гуруҳи етакчиси Доку Умаров топшириғи билан тузилган қуролли гуруҳга қўшилишни таклиф қилган, у президентга суиқасд уюштиришни режалаштирган.
Гуруҳ аъзолари Москвада давлат раҳбари кортежи ўтадиган йўлда миналанган автомобилни портлатиши керак эди. Бунинг учун гуруҳ иштирокчилари 2011 йил декабрида иккита портловчи қурилмани ясаб, уларни Одесса ташқарисида синаб кўрди.
2012 йил январида яна бир бомбани ясаш чоғида ёнғин чиқиб, Мадаев ҳалок бўлди, Пянзин ва Осмаев эса Украина ҳуқуқ-тартибот органлари томонидан қўлга олинди. Охир-оқибат, Пянзин Бош прокуратура сўрови билан Россияга топширилди.
2017 йил июлида маҳкум президентдан афв сўради, аммо рад жавоби олди. 2018 йил ноябрида ҳам Иля Пянзин муддатидан олдин шартли озодликка чиқа олмади.
Осмаев Украинада ҳибсга олинди, бироқ 2014 йил ноябрида у қўйиб юборилди. Суд уни айбдор деб топди, лекин тергов изоляторида ўтказган вақтни қамоқ муддати деб ҳисоблади. Инсон ҳуқуқлари бўйича Европа суди Украинага Осмаевни Россияга топширмасликни тавсия қилди.
Осмаев озод этилганидан кейин Жохар Дудаев (чеченистонлик айирмачилар етакчиси, 1996 йилда Россия махсус хизматлари томонидан йўқ қилинган) номидаги батальонга қўшилди ва Донбассда Украина армияси томонида туриб жанговар ҳаракатларда қатнашди.
Изоҳ (0)