15 сентябрь куни Россия президенти Владимир Путин ва Хитой Халқ Республикаси (ХХР) раиси Си Цзиньпин Самарқандда Шанхай ҳамкорлик ташкилоти (ШҲТ) саммити доирасида учрашди, деб ёзади Meduza.
Учрашув бошида Путин Хитой вакилларига «Украина инқирози» бўйича масалаларни очиқлашга ваъда берди.
«Айтиш керакки, бир қутбли дунёни юзага келтиришга уринишлар сўнгги вақтларда мутлақо хунук қиёфа касб этди ва сайёрадаги давлатларнинг аксарияти учун номақбул бўлиб қолди. Хитойлик дўстларимизнинг Украина инқирози юзасидан мувозанатлашган позициясини юқори баҳолаймиз, сизнинг бу борадаги саволларингиз ва хавотирингизни тушунамиз, ва бугунги учрашув давомида, албатта, ушбу масала бўйича позициямизни очиқлаб ўтаман, гарчи биз бу ҳақда аввал ҳам гаплашган бўлсак-да», — деди Путин.
Шунингдек, у Россия «ягона Хитой» тамойилига қатъиян риоя қилишини ва АҚШнинг Тайвандаги «провокациялари ва гумашталари»ни қоралашини айтди.
Си Цзиньпин, ўз навбатида, кириш гапида томонлар пандемия таъсирини енгиб ўтиб, «энг муҳим стратегик мулоқот»ни давом эттиришга муваффақ бўлганини таъкидлади. У Россия ва Хитойни дунёга «бироз кўпроқ барқарорлик» тақдим этаётган етакчи дунё мамлакатлари деб атади.
12 сентябрь куни Си Цзиньпин коронавирус пандемияси бошланганидан буён биринчи марта Хитойдан ташқарига чиқди. ШҲТ саммити олдидан ХХР етакчиси Қозоғистонга ташриф буюрди.
Аввалроқ Россия президенти Владимир Путин ва Хитой Халқ Республикаси раиси Си Цзиньпин ноябрь ойида Балида бўлиб ўтадиган G20 саммитида шахсан иштирок этишни режалаштираётгани ҳақида Индонезия президенти Жоко Видодо маълум қилганди.
Кейинроқ улар G20 саммитини кутмасдан, 16 сентябрь куни Шанхай ҳамкорлик ташкилотининг Ўзбекистондаги саммитида учрашув ўтказиши хабар берилди.
Хитойлик мансабдорлар Самарқандга сафар Си Цзиньпин Ғарбнинг Хитойни тийиб туриш бўйича саъй-ҳаракатларига қарши туриш учун АҚШ билан иттифоқдош бўлмаган мамлакатлар билан хавфсизлик соҳасида яқин алоқаларни ривожлантириш мақсадига урғу беришини қайд этганди.
Изоҳ (0)