Britaniyaning The Sun nashrida e’lon qilingan, go‘yoki, Rossiya prezidenti Vladimir Putinga nisbatan suiqasd uyushtirilgani haqidagi ma’lumot haqiqatga to‘g‘ri kelmaydi, deya ma’lum qildi davlat rahbari matbuot kotibi Dmitriy Peskov.
Nashr Rossiya prezidentiga yaqin manbalariga tayanib yozishicha, Putinning korteji 14-sentabr kuni Moskvada “hujumga uchragan”: prezident limuzinining oldingi chap g‘ildiragidan “qattiq paqillash” ovozi eshitilgan, shundan keyin “quyuq tutun” paydo bo‘lgan. Gazeta ma’lumotlariga ko‘ra, xavfsiz joyga olib o‘tilgan, Putinga jabr yetmagan.
The Sun nashri ma’lumoti haqiqatga to‘g‘ri keladimi, degan savolga Peskov: “Yo‘q”, — deb javob berdi.
2013-yil sentabrida Moskva shahar sudi Putinga nisbatan suiqasd tashkillashtirishda ayblangan qozog‘istonlik Ilya Pyanzinni o‘n yillik qamoqqa hukm qilgandi. Tergov versiyasiga ko‘ra, Adam Osmayev va Ruslan Madayev 2011-yil dekabrida Ukrainada Pyanzinga Rossiyada taqiqlangan “Imarat Kavkaz” terrorchilik guruhi yetakchisi Doku Umarov topshirig‘i bilan tuzilgan qurolli guruhga qo‘shilishni taklif qilgan, u prezidentga suiqasd uyushtirishni rejalashtirgan.
Guruh a’zolari Moskvada davlat rahbari korteji o‘tadigan yo‘lda minalangan avtomobilni portlatishi kerak edi. Buning uchun guruh ishtirokchilari 2011-yil dekabrida ikkita portlovchi qurilmani yasab, ularni Odessa tashqarisida sinab ko‘rdi.
2012-yil yanvarida yana bir bombani yasash chog‘ida yong‘in chiqib, Madayev halok bo‘ldi, Pyanzin va Osmayev esa Ukraina huquq-tartibot organlari tomonidan qo‘lga olindi. Oxir-oqibat, Pyanzin Bosh prokuratura so‘rovi bilan Rossiyaga topshirildi.
2017-yil iyulida mahkum prezidentdan afv so‘radi, ammo rad javobi oldi. 2018-yil noyabrida ham Ilya Pyanzin muddatidan oldin shartli ozodlikka chiqa olmadi.
Osmayev Ukrainada hibsga olindi, biroq 2014-yil noyabrida u qo‘yib yuborildi. Sud uni aybdor deb topdi, lekin tergov izolyatorida o‘tkazgan vaqtni qamoq muddati deb hisobladi. Inson huquqlari bo‘yicha Yevropa sudi Ukrainaga Osmayevni Rossiyaga topshirmaslikni tavsiya qildi.
Osmayev ozod etilganidan keyin Joxar Dudayev (chechenistonlik ayirmachilar yetakchisi, 1996-yilda Rossiya maxsus xizmatlari tomonidan yo‘q qilingan) nomidagi batalyonga qo‘shildi va Donbassda Ukraina armiyasi tomonida turib jangovar harakatlarda qatnashdi.
Izoh (0)