Қирғизистоннинг Тожикистон билан чегарадаги қишлоқлари отишмалар туфайли эвакуация қилина бошлади

Қирғизистоннинг чегара яқинидаги Борбордук, Арка, Жаштик ва Достук қишлоқлари (Лайлак тумани) аҳолиси мамлакат ичкарироғига эвакуация қилина бошлади, деб ёзади «РБК».

Республика Давлат миллий хавфсизлик қўмитаси маълум қилишича, Тожикистон томони Боткен туманида бутун чегара бўйлаб чегара ва фуқаролик объектларига ҳужум қилган.

«Қирғизистон ДМХҚ Тожикистон томонини ўт очишни тўхтатиб, барча саъй-ҳаракатларини қуролли низони сусайтиришга ва тинчликни сақлашга қаратишга чақиради», — дейилади хабарда.

Боткен вилояти маъмуриятининг дастлабки маълумотларига кўра, отишмалар чоғида тўрт нафар қирғиз чегарачиси жароҳатлар олган.

Тожикистон томонидан Қирғизистон позицияларини, шу жумладан, чегара заставасини ўққа тутиш бошлангани ҳақида ДМХҚ 16 сентябрь куни эрталаб хабар берди.

Хусусан, Эки-Таш, Чир-Добо, Кум-Мазар ва Орто-Боз манзилгоҳларидаги қирғиз позициялари ўқотар қуролдан нишонга олинган. Кейинроқ «Кок-Таш» чегара заставаси миномётдан ўққа тутилган. Шунингдек, Паски-Арик ҳудудида жойлашган «Самаркандек» чегара заставасига қарата ўт очилган.

Шундан сўнг Лайлак туманидаги Кулунду, Максат ва Жани-Жер қишлоқлари ҳам ўқ ёмғири остида қолди.

Тожикистон Давлат миллий хавфсизлик қўмитаси чегара қўшинлари матбуот хизмати, ўз навбатида, 16 сентябрь куни эрталаб «Кок-Таш» чегара заставасидаги қирғиз чегарачилари «келишувни бузган ҳолда» республиканинг «Исфара» отрядига тегишли «Душанбе» чегара заставасини ўққа тутганини маълум қилди. Бундан ташқари, қирғизистонлик ҳарбий хизматчилар Исфара шаҳридаги Хожаи Аъло, Куммазор, Сурх, Сомониён, Кулканд, Бобожон Гафуров туманидаги Хистеварз ва Овчиқалъача аҳоли пунктларига қуролли ҳужум уюштирган.

Кейинроқ томонлар ўт очишни тўхтатишга келишиб олган, бироқ Тожикистон томони маълумотларига кўра, шунга қарамасдан, қирғиз ҳарбийлари мамлакат ҳудудини ўққа тутишда давом этмоқда.

Тожикистон ва Қирғизистон чегарасида 14 сентябрь куни эрталаб отишма бўлиб ўтган эди. Кейинроқ ушбу воқеа оқибатида Тожикистон чегара хизмати ходими ҳалок бўлгани, яна икки киши жароҳатлангани хабар берилди. Тожикистон чегара хизмати томонлар вазиятни барқарорлаштириш бўйича музокаралар олиб бораётганини қайд этганди.

Қирғизистон ва Тожикистон чегараси вақти-вақти билан икки мамлакат маҳаллий аҳолиси ва чегарачилари ўртасидаги низолар ҳудудига айланиб туради. Бунга сабаб делимитация қилинмаган ерлар бўлиб, у ерларда давлатлар ўртасидаги чегара қаердан ўтишини аниқлаб бўлмайди.