Россиянинг Белгород вилояти Валуйки шаҳри Украина томонидан ўққа тутилди, деб ёзади «РБК» губернатор Вячеслав Гладковга таяниб.
Дастлабки маълумотларга кўра, бир киши ҳалок бўлган, яна икки киши яраланган.
«Украина Қуролли кучлари Валуйкини ўққа тутди. Ҳаво ҳужумига қарши мудофаа тизими ишлаб кетди, аммо ерда вайронагарчиликлар бор», — деб ёзди губернатор ўз Telegram-каналида.
Хусусан, подстанцияга зарар етди, натижада шаҳарда электр таъминоти ишдан чиқди. Бундан ташқари, саккизта хусусий уй ва учта машина ёниб кетди.
Воқеа жойига ФВВ ҳудудий бошқармаси бошлиғи ва бошқа раҳбарият вакиллари, шунингдек, тезкор хизматлар етиб келди.
Белгород вилояти маъмурияти аҳоли пунктлари Украина ҳудудидан ўққа тутилгани ҳақида аввал ҳам бир неча марта маълум қилган. Яқинда губернатор Украина ҳарбийлари Харьков вилояти билан чегарадош бўлган Красний Хутор қишлоғига кетма-кет икки кундан буён ўқ ёмғири ёғдираётганини айтганди. Чегара яқинида яшайдиган одамлар эвакуация қилинган.
Кейинроқ Харьков вилоятига ёндош Нехотеевка қишлоғи ҳам нишон остида қолди, у ерда аҳолининг аксарияти баҳордаёқ кўчириб юборилганди.
Изоҳ (0)