«Баҳо бўйича менга илтимос бўлса ҳам аралашмаяпман, аралашсам ҳам бир иш чиқмаслигини биламан» – Абдуқодир Тошқулов

Ўзбекистонда супер контрактга кирган талаба яхши ўқий олмаса таълимни битиролмайди. Бу ҳақда АОКАда бўлиб ўтган матбуот анжуманида олий таълим вазири Абдуқодир Тошқулов айтиб ўтди.

Абдуқодир Тошқуловнинг маълум қилишича, олий таълим муассасаларида ўқиш кундан-кунга қийинлашиб боряпти, абитуриент супер контрактни тўлаши мумкин, лекин битиролмайди.

«Ота-оналарга мурожаат қилдимки, болангизни эртага ўқиб кетишига ишонсангиз супер контракт тўланг. Аввалгидек телефон қилиб болангизни курсдан-курсга ўтказолмайсиз. Мен сизга тўғрисини айтаман, мен вазирман, менга илтимос бўлса мен аралашмаяпман, аралашганим билан бир иш чиқмаслигини ҳам биламан.

Кредит модуль тизими бўйича платформа ишлаяпти. Бу ҳам контракка ўхшаб техникани қўлига бериляпти аста-аста. Бу жараёнларга бир йил муддат беринглар.

Таълим сифати бўйича бутун бизга хос бўлмаган ишларни муҳтарам президентимиз биздан олдиртириб бердилар.

Бу йил фақат ва фақат сифат билан ишланади», – олий таълим вазири.

Аввалроқ вазир Абдуқодир Тошқулов ОТМга кириш имтиҳонларида абитуриентларга 5 та йўналиш танлови берилиши қобилиятларни асраб қолишда имконият яратишини айтиб ўтган эди.