Кадастр хизматларидан фойдаланишда муаммолар юзага келмоқда. Кадастр агентлиги ҳолатни изоҳлади

Ижтимоий тармоқларда Кадастр агентлиги хизматларидан фойдаланганлик учун тўлов қилишда муаммолар юзага келаётгани тўғрисида хабарлар тарқалди. Агентлик ахборот хизмати ҳолатга муносабат билдирди.

Қайд этилишича, кадастр хизматларидан Давлат хизматлари маркази (ДХМ), Ягона интерактив давлат хизматлари портали (ЯИДХП) my.gov.uz ҳамда нотариуслар орқали фойдаланиш мумкин. Кадастр агентлиги бу йўналишда АТБ Universalbank билан ҳамкорликда ишлаб келмоқда.

Банклараро универсал тармоқли ахборот тизими (Мунис) тўлов тизими ҳамда АТБ Universalbank орқали амалга оширилган банк операциялар натижаларини солиштириш ишлари олиб борилаётганлиги сабабли кадастр хизматларидан нотариус орқали фойдаланганда тўлов қилиш вақтинча тўхтатилган. Бу ҳақда банк маълум қилган.

Банк носозликларни тез фурсатларда бартараф этиши ва тизимни ишга туширишини билдирган. Ушбу ҳолатга инвойснинг ҳеч қандай алоқаси йўқ.

Маълумот учун, Ягона интерактив давлат хизматлари портали my.gov.uz ва Давлат хизматлари марказлари орқали юборилган аризаларнинг тўловларида муаммолар йўқ.

«Фуқароларимиз юқоридаги носозликлар бартараф этилгунга қадар кадастр хизматларидан ДХМ ва ЯИДХП (my.gov.uz) орқали фойдаланишлари ва тўлов қилишлари мумкин», — дейилади хабарда.