«Бу ерда ҳар бир ишинг кимнидир боқиш, кимгадир тиз чўкиш билан битади» – шифокор Мақсуд Маллаев коррупция сабаб Ўзбекистонни тарк этган тадбиркор дўсти ҳақида

Шифокор Мақсуд Маллаев «Дарё»га берган интервьюсида Ўзбекистондаги айрим муаммолар, хусусан, коррупция масаласида фикрларини билдирди.

Мақсуд Маллаевнинг айтишича, унинг бадавлат дўстларидан бири айнан коррупция сабабли Ўзбекистонни тарк этган.

«Бизга ватанпарварлик туйғуси жуда зарур. Бу баландпарвоз гапдек туюлади. Ким чет элда яшаб кўрган бўлса, буни яхшироқ ҳис қилади. Бир ўртоғим Америкадан жуда катта ғоя ва суммалар билан ватанимизга келди. «Айтишник» эди, IT мактабини очди. Ўзбекистонга жуда катта пул тикди.

«Ватаним учун қилай шу ишларни», деди. Шу ватанда туғилган ҳар бир одам агар шу даражадаги ишларни қила олганда Ўзбекистон ҳозир ривожланиш бўйича Дубайдан ҳам ўтиб кетарди. Кейин у Америкага яна кетиб қолди. Нега кетдинг, десам, шундай жавоб берди: «Ўзбекистонда ҳар бир қилмоқчи бўлган ишинг учун ‘ташлаб туришинғ керак экан. Яъни ҳар битта қилинадиган ишинг кимнидир боқиш билан, кимгадир тиз чўкиш билан битади. Нима қиламан бу ерга пул тикиб, кеттим у ёқда яшайман. У ёқда ҳамма тенг», деди. Ватанпарвар бўлиб қайтиб келган одам ишига ҳалал бериш, уни синдириб юбориш керак эмас», – деди шифокор.

Шунингдек, шифокор 10 йилдан кейинги Ўзбекистон тиббиётини қандай тасаввур қилишини айтди.

«Ўн йилдан кейинги ҳолатни бошқа давлатлар билан таққосий ҳисоблайдиган бўлсак, бунинг учун у давлатлар тўхтаб туриши керак. Чунки улар ҳам ўн йиллаб тинч турмайдида, олдинга қараб кетади. Ҳозирги пайтда бизнинг тиббиётимизда олдинга қараб юриш жуда ҳам секин. Олинган нарсаларни кўз-кўз қилишимиз мумкин. Масалан, 50 та «тез ёрдам» автомобиллари, 200 та УЗИ аппаратлари олинди», деб мақтаниш мумкин. Лекин бу тиббиёт эмас. Тиббиётга кадр керак. Қани кадр? Мана шу 200 та аппарат ёнига 200 нафар мутахассисни ўтиргизиб қўйсин, ундан кейин «биз 200 та УЗИ тизимини йўлга қўйдик», десин.

Мана шу нарса тиббиёт дейилади. Олдинга қараб кетишимиз суст деганимиз, бизда тиббиёт кадрлар масаласида оқсаяпти. Агар шу зайлда кадрлар чет элга чиқиб кетаверса, борлари ҳам биологик ёки бошқа сабаблар туфайли йўқолиб борса, 10 йилдан кейин анча орқага кетиб қолишимиз мумкин. Чунки ҳозирги пайтда кадрлар алмашинув жараёнида бўшлиқлар катта. Уларни олдиндан ҳисобга олиб, тўлидириб бориш керак», – деди Мақсуд Маллаев.