Янги қирол биринчи марта британияликларга мурожаат билан чиқди

Британиянинг янги қироли Чарльз III мамлакат аҳолисига биринчи марта мурожаат билан чиқди, деб ёзади «РБК». У ўз нутқини яқинда вафот этган қиролича Елизавета II ҳақидаги гаплар билан бошлади.

«Бутун умри давомида қиролича ҳазрати олиялари — менинг севимли онам — мен ва оилам учун илҳом манбаи ва ўрнак бўлиб хизмат қилди, ва биз унинг олдида чин кўнгилдан қарздормиз, бундай қарздорликни бир оила фақат ўз онасига нисбатан ҳис қилиши мумкин», — деди монарх.

У қиролича Елизавета II муносиб умр кечирганини қайд этди ва ҳаётининг сўнгига қадар Британия халқига хизмат қилишга ваъда берди.

Шунингдек, қирол «мамлакатнинг юраги бўлган» конституциявий тамойилларни ўзидан аввалги монарх каби — «мустаҳкам содиқлик билан» ҳимоя қилишга ваъда берди.

Бундан ташқари, Чарльз III тўнғич ўғли Уильямни Уэльс шаҳзодаси деб эълон қилди (тахтга навбатда биринчи бўлиб турган номзодга шундай унвон берилади). Унинг рафиқаси Кэтрин Уэльс маликасига айланади.

У ўз нутқида кенжа ўғли шаҳзода Гарри ва унинг рафиқаси Меган Марклни ҳам тилга олди. «Шаҳзода Гарри ва Меганга ўз муҳаббатимни изҳор қиламан, улар чет элда ўз ҳаётларини қуришда давом этмоқда», — деди у.

Қирол ўз мурожаатини Елизавета II га қаратилган гаплар билан якунлади.

Елизавета II 8 сентябрь куни 96 ёшида вафот этди. Ҳозир Британияда умуммиллий мотам бўлиб ўтмоқда, у қироличанинг дафн маросимидан кейин яна бир ҳафта давом этади. Айни пайтда унинг жасади Балморалда қолмоқда. Вафотидан кейин уч кун ўтгач, унинг жасади Букингем саройига ўтказилади. У ердан эса олтинчи куни тобут Британия парламенти биносига юборилади. Барча хоҳловчилар келиб, қиролича билан видолашишга улгуриши учун тобут у ерда уч кун сақланади.

Чарльз III бугун, 10 сентябрь куни расман тахтга ўтиради. У қироличанинг ўлимидан кейин автоматик тарзда қиролга айланди.

Бироқ анъанага кўра, монархнинг вафотидан кейин 24 соат ичида Сент-Жеймс саройида расмий маросим ўтказилиши керак эди. Шу сафар у кечроқ бўлиб ўтади, чунки тайёргарлик учун етарлича вақт бўлмаган.