Украина президенти Владимир Зеленский мамлакат Қуролли кучлари Харьков вилоятида Россия истилоси остида бўлган 30 дан ортиқ аҳоли пунктларини озод этганини маълум қилиди, деб ёзади Meduza. Бу ҳақда у урушнинг 198-куни якунларига бағишланган видеомурожаатида айтиб ўтди.
«Бизнинг армиямиз, Украина разведкаси ва Хавфсизлик хизмати бир нечта тезкор йўналишларда фаол ҳаракатларини давом эттирмоқда. Муваффақиятли давом эттирмоқда… Айни пайтда Украина Қуролли кучлари Харьков вилоятида 30 дан ортиқ аҳоли пунктини озод қилди ва назорат остига олди… Аста-секинлик билан янги аҳоли пунктларини назорат остига оляпмиз — ҳамма жойга Украина байроғини ва барча фуқароларимиз учун ҳимояни қайтаряпмиз», — деди Зеленский.
Украина президенти мамлакат ҳарбийлари озод этган аҳоли пунктларининг номларига аниқлик киритмади. 8 сентябрь куни у Харьков вилоятининг Изюм туманида Украина Қуролли кучлари қўли остига ўтган Балаклея шаҳридан видео эълон қилди. Украинанинг «Фокус» нашри маълум қилишича, 9 сентябрь ҳолатига Харьков вилоятида 17 та аҳоли пункти озод қилингани маълум, аммо рўйхат тўлиқ эмас.
5 сентябрь куни Украина армияси Харьков вилоятида ҳужумга ўтишни бошлади ва мамлакат Қуролли кучлари Бош штаби баёнотига кўра, уч кун ичида 50 км ичкарига кириб борилган. Ўн мингдан ортиқ россиялик ҳарбий хизматчилар қамалга тушиб қолиш хавфи остида турибди.
Владимир Зеленский 8 сентябрь куни ой бошидан буён Украина Қуролли кучлари 1000 квадрат километрдан ортиқ ҳудудни озод этганини маълум қилганди.
Изоҳ (0)