Британия қироллигини 70 йил бошқарган қиролича Елизавета II (1926—2022) ўз бурчига садоқати учун доим мақтовга сазовор бўлган, бироқ унинг ҳукмронлиги кўпинча оиласи билан боғлиқ жанжаллар остида ўтган. Қуйида унинг рекорд даражада узоқ давом этган ҳукмронлиги даврида қироллик оиласига таъсир қилган энг муҳим воқеалар билан танишамиз.
Шаҳзода Филипп. Елизаветанинг Греция шаҳзодаси Филиппга турмушга чиқиш қарори баҳс-мунозаралардан холи бўлмаган.
Филипп Иккинчи жаҳон уруши пайтида Британия Қироллик денгиз флотида хизмат қилган бўлса-да, унинг опа-сингиллари Нацистлар партияси аъзолари бўлган немис аристократларига турмушга чиққан эди. Шу сабабли унинг немис қариндошларидан ҳеч бири тўйга таклиф қилинмади.
Малика Диана ва Камилла. Елизавета II ҳукмронлиги даврида энг йирик можаро тўнғич ўғли Чарльз ва унинг биринчи рафиқаси Диананинг муваффақиятсиз никоҳи билан боғлиқ эди. Бунга Чарльзнинг Камилла Паркер Боулз билан ишқий муносабатлари, Диананинг ўлимидан кейин у билан турмуш қургани сабаб бўлган.
Чарльз ва Диананинг 1981 йилдаги эртакнамо тўйи бир умрлик бахтни кафолатламади. 1990 йил бошида жуфтликнинг никоҳи парчалана бошлади
Журналист Эндрю Мортон 1992 йилда ёзган китобида Диананинг Чарльз билан муносабатларига тузатиб бўлмас даражада путур етгани ва бахтсизлиги туфайли малика ўз жонига қасд қилишга урингани ҳақида ҳикоя қилинади.
Кейинроқ телевидениега берган интервьюларида иккаласи ҳам бир-бирга хиёнат қилганини тан олди, Диана ҳарбий офицер Жеймс Ҳуитт билан Чарльз эса Камилла билан ишқий муносабатда бўлган.
1992 йил охиридаги нутқида қиролича бу йил оғир ўтгани ортга хурсандчилик билан қараб бўлмаслигини айтди.
Бу даврда Виндзор қалъасидаги қироллик уйида катта ёнғин юз берган, Чарльз ва Диана ажралишди. Аммо уларнинг ажралиши ўша йили бузилган ягона никоҳ эмасди.
Қироличанинг иккинчи ўғли шаҳзода Эндрю ва унинг рафиқаси Сара Фергусон ҳам айро йўллардан кетишга қарор қилди.
1992 йилнинг баҳорида эса қироличанинг қизи малика Анна қарийб 20 йиллик турмушидан кейин Марк Филиппс билан расман ажрашди. Анна ўша йилнинг декабрь ойида денгиз қўмондони Тимоти Лоренсга турмушга чиқди.
Шаҳзода Эндрю ўзининг енгил-елпи ҳаёт тарзи сабаб тез-тез газета муқоваларидан жой оларди. Кейинчалик унга нисбатан жинсий зўравонлик айблови илгари сурилди.
Бунга шаҳзоданинг вояга етмаган қизлар орасида фоҳишаликни ташкиллаштиришда айбланган миллиардер Жеффри Эпштейн (2019 йилнинг августида у қамоқхона камерасида ўз жонига қасд қилган) билан алоқалари сабаб бўлган. 2022 йилда шаҳзода Эндрю ҳарбий унвонлари ва қироллик ҳомийлиги ҳуқуқларидан маҳрум этилди.
Шаҳзода Гарри ва Меган Маркл. Елизавета II нинг набираси шаҳзода Гарри болалигида Британия матбуоти томонидан қиролликнинг «ёввойи боласи» сифатида таърифланган. У вояга етмасдан пабда ичкилик ичгани, тунги клуб олдида папараццилар билан жанжаллашгани ҳақида хабарлар тарқалган, айниқса зиёфатда нацист зобитига ўхшаб кийингани омма ғазабига сабаб бўлган.
Аммо у ўзининг содда табиати ва ҳарбий хизматлари билан оммага танилди. Унинг 2018 йилда америкалик актриса Меган Маркл билан никоҳи эса янги замонавий монархиянинг тимсоли сифатида эътироф этилди.
Бироқ улар 2020 йил январь ойида қироллик ваколатларидан воз кечишга ва қироллик оиласини тарк этишга қарор қилди. 2021 йилнинг март ойида жуфтлик Лос-Анжелесга кўчиб ўтди. Ўша йили уларнинг америкалик бошловчи Опра Уинфри билан телевидение интервьюси қироллик аъзоларига ва Букингем саройига жиддий зарба бўлди. Унда Меган қироллик оиласидаги ирқчилик ва ўз жонига қасд қилиш ёқасига келиб қолгани ҳақида айтиб берган. Интервью катта шов-шувларга сабаб бўлган.
Мавзуга доир: Қиролича Елизавета II нинг мода тарихида ўчмас из қолдирган энг ёрқин образлари (фото)
Изоҳ (0)